Shillong, Lber 23
Ka Sputnik Spartan ka la pynliem noh ïa ka Shillong Sixers da 6 wiket na ka bynta ban khur jingjop ha ka P.A.Sangma Memorial T20 Cricket Tournament 2026 ba la pynlong da ka Shillong Cricket Association (SCA) ha ka lah sngi U Blei.
Ha kane ka jingïakhun kaba la long ha madan ïalehkai ka MCA kaba ha Polo, ka Shillong Sixers kaba la shimti ban tied nyngkong, ka la kamai 106 run bad shah pynhap 6 wiket ha ki 20 over. U Kevin Christopher u la khyrwit ïa ka shiteng spah kaba 54 run na ki 54 bol bad u Suraj Chettri u la ïoh 12 run na ki 15 bol. Katba u Supriyo Chanda (Player of the Match) u la khur 4 wiket bad ïa ka 1 wiket la khur da u Hameki Susngi.
Ka Sputnik Spartan ka la lah da kaba suk ban kynjoh sha ka thong ha ki 17.5 over hadien ba ka la kamai 107 run bad shah pynhap 4 wiket. U Hameki Susngi u la tied 30 run na ki 30 bol bad u Uttam Chanda u la ïoh 28 run na ki 28 bol. Katba u Lakhan Singh u la khur 3 wiket.
Haba phai sha kawei pat ka jingïakhun kaba ar, ka Rangkynsai SC ka la jop da 82 run (DLS Method) ïa ka United XI hadien ba la pynhiar sha ki 11.3 over. Ka Rangkynsai kaba la tied nyngkong ka la kamai 217 run bad shah pynhap 6 wiket ha ki 20 over. U Ram Gurung u la khyrwit ïa ka shiteng spah kaba 50 run na ki 35 bol bad u Kishan Lyngdoh u la ïoh 45 run na ki 22 bol. Katba u Bijon Dey u la khur 1 wiket bad ïa ki 2 wiket la ïoh da u Bharat Gurung.
Haba wan beh ïa ka thong, ka United XI ka la kamai tang 63 run bad shah pynhap 6 wiket ha ki 11.3 over. U Ganeshstar Syiem u la tied 16 run na ki 7 bol bad u Bharat Gurung u la ïoh 13 run na ki 25 bol. Katba u Ram Gurung (Player of the Match) u la khur 2 wiket bad ïa ka 1 wiket la ïoh da u Aryan Borah.
