Chandigarh, Lber:
Ha ka jingkhynra lang bad ki bor pahara khappud, ki pulit ka Punjab ki la ïoh ban kem ïa kawei ka kynhun kaba khaïi tuh sha shiliang pud da kaba kem ïa lai ngut ki briew bad la ïoh kurup 24.5 kg u drok heroin bad T.21 lak na ki.
Ka jingtohkit kaba hashwa ka la pynpaw ba kine kiba la shah kynnoh ki don ka jingïadei bad ki nongpynïaid ba na Pakistan, la ïathuh ki heh pulit.
Kine ki briew kiba la shah kem ki dei kiba la tip kyrteng kum u Jagjit Singh ba la tip ruh da ka kyrteng kum u Rana na ka shnong Noorwal, u Manpreet Singh ba la tip ruh kum u Preet uba na ka shnong Aulakh Khurd bad ka Roshan Singh kaba na ka shnong Dhupsari baroh ki don ha Amritsar distrik, ong u DGP ka Punjab u Gaurav Yadav ha ka sngi U Blei.
Lait na u drok heroin bad ka pisa, ki BSF bad ki pulit ki la ïoh kurup ruh ïa kawei ka drone multi-copter, kaba la pyndonkam da ki nongkhaïi beaiñ kiba sah ha Pakistan ban pynpoi ïa ki mar na shiliang khappud, bad ar tylli ki kali, kynthup ïa kawei ka Mahindra Thar, kaba la pyndonkam ban pynpoi ïa utei u drok.
Hadien ka jingtohkit kaba bniah bha, ki kynhun pulit ki la lah ban pyndam noh ïa kane ka kynhun kaba ïadei bad ka Pakistan, ong u Gaurav Yadav.
U la ong ba ka jingtohkit kaba kham bniah ka dang ïaid shakhmat ban lap ïa ka jingïadei ha kane ka kam.
