Shillong, Lber 23
Lai ngut ki rangïalehkai ka Jylla hapoh ka lama jong ka Meghalaya Cricket Association (MCA) ki la shah jied ha ka Centre of Excellence (CoE) jong ka BCCI na ka bynta ban ïashim bynta ha ka prokram kilanmet jong ka North East Senior Men Camp 2026 kaba la thmu ban pynlong naduh 20 tarik u Ïaïong haduh 14 tarik u Jymmang ha Ranchi.
Kine ki long u Kishan Lyngdoh, Akash Kumar Choudhary bad u Aryan Borah ha kaba ki la shah khot hadien ba ki la lah ban ïalehkai bha ha ki lympung ïalehkai jong ka BCCI na ka bynta ka aïom ïalehkai 2025-26 kum ka Ranji Trophy, Vijay Hazare Trophy bad ka Syed Mushtaq Ali Trophy.
Na ka liang ka MCA ka la ai khublei ïa kitei ki rangïalehkai kiba la shah jied ban don bynta ha ka prokram kilanmet jong ka BCCI bad ka la kitbok ba kin nangkiew shaphrang ha ka kam ïalehkai jong ki.
