Shillong, Lber 23
Ka kynhun ki ‘thei ïalehkai U-20 jong ka ri India, ka la poi ha Thailand ha ka sngi Thohdieng na ka bynta ban pynkhreh ïa ka AFC U-20 Women’s Asian Cup bad ka ‘thei apkol na Meghalaya ka Ribansi Jamu ka la don lang ha kane ka thup kaba 24 ngut ki nongïalehkai.
Kane ka kynhun ïalehkai kaba la ïoh rung sha ka Asian Cup hadien 20 snem, ka dangdon ïa ka por kumba 12 sngi ban pynïahap bad ka jinglong ka mariang ha Bangkok hashwa ba kan ïakhun nyngkong ha ka Group-C pyrshah ïa ka Japan ha ka 2 tarik u Ïaïong. Hadien ka India kan ïakhun sa ïa ka Australia ha ka 5 tarik bad ïa ka Chinese Taipei ha ka 8 tarik.
Ki ar tylli ki team kiba wan ha ki kyrdan ba hakhlieh na kawei pa kawei ka group bad ki ar tylli ki kynhun kiba kynsai ki ban wan ha ka kyrdan kaba lai, kin ïoh rung sha ka quarter final. Shuh shuh, ki saw ngut ki kynhun ki ban khur jingjop ha ka quarter phainal kin ïoh rung sha ka FIFA U-20 Women’s World Cup Poland 2026.
Ka India, hapoh ka jingïalam jong u coach na Sweden, u Joakim Alexandersson, ka la sdang ïa ka jingkilanmet ha Bengaluru naduh u Kyllalyngkot hadien ba la pynkut ïa ka bynta ba nyngkong jong ka IWL. Hadien kata, ki la don ka jingïalehkai kaba shibnai ha Sweden, ha kaba ki la ïalehkai san tylli ki jingïalehkai paralok pyrshah ïa ki kynhun na ki klob jong ka Sweden. Hadien ba ki la wanphai na Scandinavia, ki ‘thei ïalehkai ka ri ki la bteng ïa ka jingkilanmet ha Kolkata, na katei ka jaka ki la mih noh ban leit sha ka Thailand ha ka sngi Palei.
Na ka liang u Alexandersson un sa pynbna sa tang 23 ngit ki ‘thei ïalehkai hashwa ban sdang katei ka lympung.
