Shillong, Lber 23
Ka Confederation of Meghalaya Social Organisation (CoMSO) hapoh ka jingïalam u Vice Chairman, u Bah Sambormi Lyngdoh ha ryngkat ki nongïalam ka JNC bad HYC East Jaiñtia Hills District ha ka sngi Nyngkong ka 23 tarik u Lber 2026, ki la leit ban kynduh ïa u Balkarin Ch Marak, u nongïalam ka GSMC bad kumjuh ruh u General Secretary ka CoMSO uba la shah kem bad shah set ha Jowai District Jail halor ki jingïakhih ha Rilum Garo.
Ka Confederation of Meghalaya Social Orga-nisations (CoMSO) ka pynpaw ïa ka jingsngew -khia kaba jur halor ka jinglong jingman ha Rilum Garo haduh mynta.
Haba kren sha ki lad pathai khubor u Bah Sambormi u la ong ba ha kum kane ka por la donkam ban wanrah ïa ka jingsuk bad ka jingshngaiñ hynrei ki sienjam ba dang shen ba la shim da ka Sorkar Jylla, khamtam ka jingkem ïa ki nongïalam jong ki kynhun sengbhalang ka Rilum Garo ka la nang wanrah pynban ïa ka jingbymshngaiñ bad ka jingïakynad ha ka thaiñ hi baroh kawei.
“Ka CoMSO ka ngeit skhem ba ki kynhun sengbhalang ki don ka bynta kaba kongsan ha ka ban pynpaw ïa ka sur bad ki jingeh jong u paidbah” u la ong.
U la pynpaw ba ka jingkem ïa ki nongïalam sengbhalang kam dei ka lynti ban wanrah jingsuk, hynrei ka lah ban pynheh shuh-shuh ïa ka jingïakynad bad ban wanrah ïa ka jingbymshaniah hapdeng ka Sorkar bad u paidbah. Kum kine ki sienjam ki lah ban wanrah jingeh pynban ïa ki jingpyrshang ban wanrah biang ïa ka jinglong kaba jai-jai ha ka thaiñ hi baroh kawei.
Namarkata, u ong ba ka seng ka kyrpad jur ïa ka Sorkar Jylla ban shim noh mardor ïa ki sienjam ban wanrah ïa ka suk ka saiñ da kaba sangeh noh ïa ki jingkem shuh shuh ïa ki nongïalam bad dkhot ki sengbhalang bapher-bapher bad ban buh hakhmat eh ïa ka jingïakren bad ïa sngewthuh jingmut ban pynbeit ïa ki jingeh baroh. Ym lah ban wanrah ïa ka jingsuk da ka bor, hynrei ka jingsuk kan wan lyngba ka jingsngewthuh, ka jingïadei bad ka jingïatreilang.
Shuh shuh u la ong ruh ba ka CoMSO ka khot bad kyntu ïa ka Sorkar ban shim mardor ïa ki sienjam ban pynjem ïa ka jinglong jingman, ban pynthikna ïa ka jingpyllait noh ïa kiba la shah kem baroh bad ban trei lang bad ki nongïalam seng paidbah ban wanrah biang ïa ka jingsuk bad jingïatylli ha Rilum Garo.
