Shillong, Lber 23
Katba ka jingkhmih lynti ka dang kiew na ka bynta ka jingwan jong ka Def Leppard, ka kynhun rock ba heh tam jong UK, na ka bynta ka tour jong ki ha India ha une u bnai Lber, ka BookMyShow Live, ka bynta jong ka BookMyShow kaba peit ïa ki jingpynlong tamasa, ka la pynbna ïa ka thup jong ki kynhun rock na India kiba paw ban plie ïa ki show ha ki lai tylli ki nongbah.
Da kaba wanrah lang ïa ki riewpawkhmat rock na ka pyrthei bad ki nongpynmih rock India kiba la paw, kane ka tour kan kynthup ïa ka Trance Effect, Indus Creed bad Thermal And A Quarter kum ki opening acts ha Shillong, Mumbai bad Bengaluru.
Ym tang ba kine ki kynhun kin pynkhreh ïa ka lynti na ka bynta ka tour, hynrei ka jingpynrung ïa ki opening acts ka pyni ruh ïa ka jingkylla kaba khraw ha ka rukom jingïaid ka tem ka put ha India. Ka jingïashim bynta lang bad ki nongrwai ba paw kum ka Def Leppard ka ai ïa ki kynhun rock na India ka lad kaba kyrpang ban ïeng ha khmat hajar ngut ki nongpeit kiba sngewtynnad.
Ha kane ka por ba ka rock ha India ka dang kiew suk hynrei shisha, kine ki lad ki don bynta ban pynkhlaiñ ïa ki sur jong ki nong India, ban pynroi ïa ki nongpeit thymmai bad ban pynkynmaw ïa ki paidbah ba ka mynsiem jong ka rock ka don tynrai kaba jylliew ha India. Katba ki kynhun na shabar ri ki dang wan bun sha ki tamasa ha India, ka jingïatreilang hapdeng ki nongrwai ba nabar (global icons) bad ki nong India ka pyni ïa ka jingïaid shaphrang kaba thymmai – kaba kham jam, kaba kham sngew sarong bad kaba kham don jingïadei bad ka pyrthei.
Ka tour kan sdang ha Shillong ha ka 25 tarik Lber 2026 ha RBDSA Sports Complex, ha kaba ka kynhun rock kaba don ka bor Trance Effect kan plie ïa ka jingïalang. La tip ïa kane ka kynhun na ka bynta ka jingpyni stage kaba sngewtynnad bad ka jingïasnoh lang jong ka hard rock bad ki jingpynwandur thymmai, kaba la pynlong ïa ki ban ïoh ka kyrteng kaba bha ha ka rock circuit ha India, kaba pynlong ïa ki kum ka jingjied kaba biang ban pynsdang ïa ka jingrwai ha Shillong, kaba ju khot kum ka “rock capital” jong ka ri.
Ha Mumbai ha ka 27 tarik u Lber 2026, ha Jio World Garden, ka kynhun rock ba pawnam Indus Creed kan shim bynta. Ka tour kan kut ha Bengaluru ha ka 29 tarik Lber 2026 ha NICE Grounds, ha kaba ka kynhun ba ïeid paidbah jong ka nongbah, Thermal And A Quarter, kan plie ha katei ka miet.
