Chennai, Lber:
Ka seng Tamilaga Vettri Kazhagam (TVK), kumba la pynbna kan sa ïakhun laitluid ha ka elekshon jong ka ïingdorbar thawaiñ jong ka Puducherry, kaba la buh ban long ha ka 9 tarik, Ïaïong, bad ka jingñiew vote kan long ha ka 4 tarik, Jymmang.
Ka samoi treikam ba mynta jong ka Ïingdorbar Thawaiñ jong ka Union Territory kaba don 30 ngut ki dkhot jong ka Legislative Assembly kan kut noh ha ka 15 tarik u Jylliew.
Ha ka elekshon sha ka Ïingdorbar Thawaiñ ka Puducherry 2021, ka AINRC ka la paw kum ka seng kaba heh tam da kaba ïoh 10 ngut, bud sa ka DMK kaba ïoh 6 ngut, katba ka BJP bad ka Congress ki jop mar 6 ngut.
Ka jingpoi ki nongthep vote ka long 84.8 percent.Kumba la khmih lynti, la ong ba kin sa don bun ki nongleit thep vote ki ban sa leit ban ïashim bynta ha katei ka sngi bad kane ka ai jingkyrmen ïa kane ka seng ba kan ïohrah ïa ka jingjop naba ka don jingthmu ban trei bha bad ban kyntiew ïa ka thaiñ.
Katba ha ka elekshon 2016, ka Congress ka la ïoh ïa ka jingbun paid da kaba ïoh 15 tylli ki seat, ka AINRC ka la ïoh 8 tylli ki seat, ka AIADMK ka la ïoh 4 tylli ki seat, bad ka DMK ka la ïoh 2 tylli ki seat, ha kaba ka jingwan thep vote jong ki nongthep vote ka long 83.6 percent.
Ha kajuh ka por, ka BJP ka la pynmih ïa ka thup kyrteng jong ki khyndai ngut ki kyrtong na ka bynta kane ka elekshon, kaba ka ïakhun da ka jingïatreilang bad ka All India NR Congress ha ka 21 tarik u Lber. Ka Central Election Committee jong ka BJP ka la ïakynduh ha ka 18 tarik u Lber ban rai ïa ki kyrtong ha ki jylla kiba dang hap ban leit thep vote.
Katkum ka thup, u A Namassivayam un ïakhun na Mannadipet, katba u E Theeppainthan un ïakhun na Oussoudu (SC). U PML Kalyanasundaram un ïakhun na Kalapet, u VP Ramalingame na Raj Bhavan bad u A Johnkumar na Mudaliarpet.
U Embalam R Selvam un ïakhun na Manavely, u GNS Rajasekaran na Thirunallar bad u A Dineshan na Mahe.
U MLA shimet u M Sivasankar na Ozhukarai seat jong ka Puducherry ruh u la pynïasoh ïalade sha ka seng Congress ha ryngkat ka jingdon lang u Incharge ka Puducherry u Girish Chodankar bad ki nongïalam shnong ha ka por ba kan long sha ka elekshon sha ka ïingdorbar thawaiñ jong u snem 2026.
U M Sivasankar u la jop ïa ka elekshon 2021 na ka Ozhukarai konstitwensi.
