Shillong, Lber 23
U Myntri ka tnad pule-puthi ka Jylla, Bah Lahkmen Rymbui ha ka Lah Sngi U Blei u la pynbna ba ka jingpynshisha ïa ki nonghikai SSA bad ‘Adhoc’ ka dang ïaid shakhmat ha baroh kawei ka Jylla, kaba plie lynti pat ïa ka rukom siew tulop ka bathymmai ka ban treikam naduh ka 1 tarik Ïaïong, 2026.
“Ka lynti na ka bynta ka jingpynshisha…ka dang ïaid ha kylleng ka Jylla,” ong u Bah Lahkmen ha ki nongthoh khubor, da kaba kdew ba ka West Garo Hills ka la plie ïa ki jaka ba kyrpang ban pynïaid shakhmat ïa ki kam ki jam wat hapdeng ki jingpynthut ba dang shen ha ka liang ka shong suk shong shngaiñ.
Ha kajuh ka por, u Myntri um shym la don ïa ki jingkheiñ pynshisha kiba pura hynrei u khmih lynti ba ïa kane ka kam yn pyndep hapoh ar taïew.
“Ka Sorkar ka kular ba ïa ka rukom siew bathymmai yn pyntreikam naduh ka 1 tarik u Ïaïong, 2026,” la bynrap u Myntri.
Haba kylli shaphang ka jinglut, u Bah Lahkmen u la buh ïa ka jingpynlut kum ka jingkynshew bad ym kum ka jingpynlut.
“Haba ngi pyrshang ban ai ïa kaba bha tam sha ki khynnah pule, ngi hap ban kynshew,” u la ong.
U la buh jingkheiñ ïa ka jingpynlut shuh kaba T.220-250 klur – kaba pynlong ïa ka tulop ki nonghikai baroh ban kot sha kumba T.850 klur – kaba sah pat ka long ka jingdon ki nonghikai bad ka jingpynshisha ba la pynshong nongrim katkum ka jingshemphang.
U Bah Lahkmen u la ong ruh ba ïa ka rukom siew ka bathymmai yn pynïahap katkum ka jingslem ha ka jingshakri jong ki.
“Hynrei ngin sa tip ïa ka jingkheiñ kaba tikna hadien ba la dep pynshisha namar…kito kiba la sdang trei, ka tulop ka long katne, hadien san snem – ka long katne, hadien katta tylli ki snem – haduh katne, hadien arphew snem – haduh katne,” u la batai.
“Ngi shim ïa ka kum ka jingkynshew na ka bynta ka jingpule kaba kham bha,” u la ong da kaba kyntu ïa ki nonghikai ban long kiba ïaineh ha ka kam jong ki bad ki ‘School Managing Committee’ ban buddien haba ïadei bad ki kam ki jam.
Shuh shuh u Bah Lahkmen u la pynpaw ïa ka jingkyrmen skhem ba ka jingpynbha ïa ka jingsiew kan nang ai mynsiem ha ka ban trei minot ïa ka kam da kaba ong, “Ki nonghikai haba ki ïoh duna ka tulop ki trei shitom bad mynta… kin sa leh bha kham bun shuh-shuh.”
