Amaravathi, Lber:
U Myntri Rangbah ka jylla Andhra Pradesh u N Chandrababu Naidu u la buh ïa u maw nongrim na ka bynta ka ArcelorMittal Nippon Steel India (AM/NS India) Integrated Steel Plant ha Rajayyapeta ha Anakapalle distrik ha ka lah sngi U Blei.
Kane ka projek, kaba la bei tyngka haduh T.1.36 lak klur, ka dei kaba heh tam ha ka kam shna nar jong ka jylla bad la khmih lynti ba kan pynmih kumba shi lak tylli ki kam.
Ka Greenfield Steel Plant, kaba dang pynwandur ha ki ar bynta, kan don ka jinglah ban pynmih mar 17.8 million ton ha ka shisnem.
Yn tei ruh ïa ka kad liengsuiñ kaba la buh da ka jingbei tyngka kaba T.11,198 klur, kaba pynmih sa 6,000 tylli ki kam.
Ïa kane ka karkhana yn pynïasoh bad ka surok bah National Highway 16, ha kaba ka jingpynheh ïa ka surok saw lynti ka dang ïaid shakhmat.
Ka bynta ba nyngkong jong ka Steel projek kaba heh bha, kaba don ka jinglah ban pynmih kaba heh haduh 8.2 million ton ha ka shisnem katkum ka jingpynbna jong ka mariang, kan donkam ïa ka jingbei tyngka kaba palat T.70,000 klur bad la khmih lynti ba kan sdang ban pynmih ha u snem 2028.
Ha u bnai Jylliew, 2030, yn pyntreikam ïa ka Blast Furnace kaba nyngkong, bud sa ka ba-ar ka ban long ha u bnai Nohprah.
Haba kren ha kane ka sngi, u Myntri Rangbah u la ong, “Tang hapoh 20 bnai, ngi la jop ban buh ïa u mawnongrim na ka bynta ka karkhana ArcelorMittal-Nippon Steel hapoh ka polisi ‘Speed of Doing Business’.
Kane ka karkhana kaba heh kan ai kam beit ïa ki lak ngut ki samla. Nga ai khublei ïa u Aditya Mittal bad ïa u Myntri Nara Lokesh na ka bynta ka jingtrei shitom jong ki ban pynlong ïa kane ka projek kaba shisha. Ka jingkhublei kaba khraw jong nga ïa baroh ki nongrep kiba la noh synñiang ïa ka jaka jong ki.”
Ïa u Naidu, ha ka jingïalang buh nongrim ïa ka karkhana AMNS, la synranlang da u Symbud Myntri Rangbah u Pawan Kalyan, u Executive Chairman ka ArcelorMittal u Lakshmi Mittal, ki Myntri ka Sorkar Pdeng u Kumaraswamy bad u Srinivasa Varma, bad kiwei kiwei.
U la ong, “Ryngkat bad kane ka karkhana, la shna ïa ka Steel City bad ka kad liengsuiñ. Ha u bnai Jylliew, 2030, yn treikam noh ïa ka Blast Furnace kaba nyngkong, bud sa kaba ar ha u bnai Nohprah.
U la bynrap, “kane ka projek kan pynkylla ïa ka thaiñ lyngba ka jingpynmih nar bad kan pynkhih ïa ka pule puthi, ka koit ka khiah, bad ka ïoh kam ïoh jam. Ka Andhra Pradesh ka dei ka jylla kaba ïadei bha bad ka jingbei tyngka ha India, kaba ai ïa ki lad ki lynti ki bym lah ban ïanujor naduh ka kam jngohkai pyrthei haduh ka kam shna tiar. Ka ArcelorMittal project ka long ka nuksa kaba kongsan ïa kaei ka ban wanrah jingmyntoi lyngba ki jingïohi jngai, ki rukom pyntreikam ha ki karkhana bad kiwei pat ki jingpyntreikam.”
U Myntri ka sorkar pdeng uba dei khmih ïa ka Steel and Heavy Industries u HD Kumaraswamy u la ong, “Katba ka India, ka ri kaba ar ha ka pyrthei kaba pynmih nar, ka nang kiew shaphrang sha ki thong jong ka ban pynmih nar ha ka por ba jrong hapoh ka Viksit Bharat 2047, ki projek kiba heh kum kane kin donkam ïa ka jingbei tyngka kaba neh, ki jingstad ba kham shajrong, ki buit jingstad.”
