Shillong, Lber 24
U rangïalehkai ba la kha ha Australia, u Ryan Williams u lah ban mih madan ïalehkai ha ka sien kaba nyngkong eh ban mihkhmat ïa ka ri India ha ka jingïalehkai kaba khatduh jong ka AFC Asian Cup 2027 Qualifier pyrshah ïa ka Hong Kong ka ban long ha ka 31 tarik mynta u bnai ha Kochi.
Kane ka la wan hadien ba u coach ka kynhun u Khalid Jamil ha ka sngi Ba-ar u la pynbna ïa ki kyrteng ki 23 ngut ki rangïalehkai.
U Williams u la shah kynthup hapoh ka kynhun ïalehkai hadien ba ka FIFA ka la ai jingbit ban mihkhmat na kawei pat ka ri, ha kaba kane ka la plie lad ïa une u rangïalehkai ba la 31 snem ka rta ban mihkhmat ïa ka India ha katei ka lympung. Ha ka jingshisha u la don bynta ha ka jingpynkhreh jong ka India na ka bynta ka jingïalehkai pyrshah ïa ka Bangladesh, hynrei u la duh ïalehkai na ka daw ka jingbym lah ban pynbiang ïa ki kot ki sla kiba ïadei ba katei ka jingkynriah ïalehkai.
Watla ka la duh rung sha ka Asian Cup, ka India ka la khmih lynti ban ïalehkai na ka bynta ban khur jingjop khnang ban kyntiew ïa ka kyrdan jong ka ha ka pyrthei.
U Williams, uba ka kmie jong u, ka wan na ka longïing Anglo-Indian ha Mumbai, kumta un sa long uba ar na ki nongïalehkai phutbol ba la kha shabar ri bad uba dei na ka ri India, ban ïalehkai na ka bynta ka ri, hadien u Arata Izumi, uba la kha na Japan, uba la mihkhmat ïa ka ri India hapdeng u snem 2013 bad 2014.
Utei u rangïalehkai u dangïalehkai mynta ha ka Indian Super League na ka bynta ka Bengaluru FC, u Williams u la ïehnoh ïa ka passport Australia ha u snem ba la lah ban ïalehkai na ka bynta ka India.
Hadien ba la kha ha Perth ha u snem 1993, u Williams u la sdang ha ka jingïaid lynti kum u rangïalehkai ha England hadien ba ula pynïasoh sha ka shlem ai jinghikai jong ka Portsmouth ha u snem 2010.
Hadien shi snem u la ïoh ban ïalehkai na ka kynhun (senior), ha kaba u la ïalehkai nyngkong pyrshah ïa ka Middlesbrough, hashwa ba un leit ban ïalehkai na ki klob kum ka Fulham bad ka Barnsley.
Ha ki lympung ïaleh-kai bar ri, u Williams u la mihkhmat ïa ka Australia ha ka AFC U-19 Cham-pionship 2012 bad ka FIFA U-20 World Cup 2013.
Ha ka kyrdan (senior) u la mihkhmat ïa ka Australia ha ka jingïalehkai paralok pyrshah ïa ka South Korea ha u snem 2019.
Kumba ka paw ka India ka la sdang ïa ka jingkilanmet ha Kochi ha ka sngi Ba-ar ha kaba 20 ngut ki rangïalehkai ki la ïashim bynta lang.
