Jowai, Lber 24
Hadien 38 snem ka jingïaid lynti, ka Nongtalang College kaba dang ïaineh kum ka college kaba rim tam ha ka thaiñ Amlarem Civil Sub Division, ka la jam sha uwei u mawjam ba kan pyndonkam ïa ka ïing building kaba pura bad kaba itynnad.
Kane ka dei ka bynta ba kongsan ha ka jingïaid shaphrang jong ka pule puthi ha ka thaiñ, bad ka paw ruh kum u soh jong ka jingtrei shitom bad ka jingïai buddien jong u MLA ka thaiñ uba long ruh u Myntri ka tnat pule puthi ka Sorkar Jylla, u Ma Lahkmen Rymbui.
Ïa kane ka kolej la seng da ka Dorbar Shnong Nongtalang hapoh ka jingïalam jong u MLA barim ka thaiñ u Ma John Deng Pohrmen ha u snem 1988.
Lah ban kdew ba ïa ka jingtei thymmai ïa ka Nongtalang College ha ka jaka kaba pura (Permanent) kaba don ha Kyrmia Jongïaw Nongtalang, West Jaiñtia Hills District la plie ha ka 11 tarik Kyllalyngkot, 2023 bad la sdang ïa ka jinglong class bad treikam ha katei ka kolej kaba pura ha ka 12 tarik Rympang, 2026.
Haba ïakren bad u Principal ka kolej u Dr. RR Kharkongor u la ïathuh ba ka jingkynriah na ka kolej barim kaba don hapoh ka shnong Nongtalang sha ka kolej kaba pura ka sdang ha ka 12 tarik Rymphang 2026.
U la ong watla ka jinglong class ka ïaid la kumba katto katne bnai hynrei ki dang don shibun kiei kiei kiba dang sah ki bym pat long janai, kum ka jingbym don ïa ka network ha kane ka jaka bad ka surok ban poi sha kolej bad ruh hapoh ka campus.
“Ka Network ka long kaba tlot bha bad ha kine ki sngi ka internet ka long kaba donkam bha ha ki jaka pule”, la ong u Principal, bad bynrap ba kawei pat ka mat ka dei ka madan ïalehkai phutbol, ka Indoor stadium kaba dang shna bad dang don hapdeng ka jingpynkhreh. Haba ïadei bad ki kamra klas u la ong ba ki la biang lut baroh.
U Principal u kyrmen lyngba ka jingtrei shitom jong u Ma Lahkmen Rymbui ki jingeh jong ka kolej shen yn sa lah ban weng kawei hadien kawei.
La ïoh ruh ban ïakren bad ki katto katne ki samla pule kiba la pynpaw ka jingsngewnguh bad ai khublei kyrpang ïa u Ma Lahkmen Rymbui ba lyngba ka jingïalam jong u, kila ïoh ïa ka building kaba pura bad ka campus kaba itynnad.
Ka samla pule Hun-i-kai-aim Rymbui ka pynpaw ka jingsngewhun mynsiem haba ka poi ha kane ka kolej bathymmai bad kala ong, ba ka lah bha ban pynleit jingmut haba batai kot ki nonghikai namar ba ka jaka ka long kynjah bad lait na ka jingsawa ki kali motor, ym kum ha ka kolej barim kaba don hapoh jong ka shnong.
Halor ki jingeh, kala ong ki don katto katne kum ka surok ban poi sha kolej hynrei ïa kane kala ong ba u MLA u la kular ban pynshna noh, bad ha kaba ïadei bad ka jingeh ha ka network kala ong hooid ka network ka duna hynrei ka pynpaw pat ka jingkmen ba ki samla pule ki ïoh ïa ka free wifi hapoh ka kolej.
Katkum ka jingshem jong ka, kala ong ba ïa mynta ki jingdonkam jong ki samla pule ki long kiba la biang lut kynthup naduh ka um, bording, Canteen, bad hadien ba la wai class ki bos kila don ban leit buh ïa ki samla pule sha la ïing.
