Mairang, Lber 24
Ha ka sngi Ba-ar jong ka taïew u phria uba jur bha ha ryngkat ka ‘erïong u la ther ha ki katto katne ki bynta jong ka Eastern West Khasi Hills District ha kaba la ong ba ki bun ki nongshong shnong ki la mad ïa ka jingkthang na ka jingjulor ba kynthup naduh ki tin sop ïing jong ki ïing, ki post ilektrik kumjuh ruh ïa ki mar rep kum ki soh, ki jhur, ki kwai bad kiwei ki jingthung bad ki jingri.
Katkum ka tyllong khubor, kane ka la jia ha ka shnong Umsakhlamyriaw bad ha ka shnong Jakhong kiba hap ha Eastern West Khasi Hills District.
Ka khubor na u Sordar ka shnong Umsakhlamyriaw u Bah B Marbaniang u la ïathuh ba kane ka jinghap u phria ha ryngkat ka ‘erïong ka la jia ha ka por kumba 2 baje tam eiei jong ka nohphai sngi ka 24 tarik u Lber 2026 ha kaba u la neh haduh shiteng kynta bad u la pynjulor ïa bun ki ïing ki sem, ki jingthung jingtep, ki soh, ki kwai bad ki jhur jong ki nongshong shnong ha kane ka thaiñ.
Shuh shuh u la ïathuh ruh ba haduh 50 tylli ki longïing ki la shah ktah bad haduh mynta ym pat ïoh jingtip halor ka jingdon kiba mynsaw jur hynrei don tang katto katne ngut ki khynnah skul kiba la shah ther ha u phria katba ki dang ïaid lynti ban leit phai sha la ïing ha kaba ki la mynsaw malu mala.
Nangta, ka khubor na une u nongïalam shnong la ong ruh ba ka la don ruh ka jingjulor jong ki ar tylli ki skul ha katei ka shnong bad ïa ka ICDS Centre jong ki paidbah.
Ka khubor na u Sordar ka shnong Jakhong u Bah S Marwein pat u la ïathuh ba kane ka jinghap phria ka la ktah palat ïa ki ïing ki sem ha kaba haduh 65 tylli ki longïing ki la shah ktah bad don katto katne ki jingri bad kiba bun ki jingthung ki la julor kum u kwai uba dang soh, kiwei ki soh kiba dang shu sdang soh, ki jhur kila shah pynjulor lut bad ka la long ka jingduhnong kaba khraw ïa ki nongshong shnong.
U la pynpaw ruh ba ka long ka jingsngewsih kaba jur ha kaba bun ki longïing ki la hap ban sah ha ki ïing jong ki paramarjan, bad u la ong ruh ba na ka liang ka shnong ka la kut lad ban ai ka jingïarap sha kitei ki longïing kiba ngat ha kane ka apot naba kat haduh 65 tylli ki longïing ki la shah ktah.
Shuh shuh na ka liang kine ki nongïalam shnong ki la ïathuh ba ïa kane ki la dep ban pyntip mar mar sha ka ophis jong ka Block Mairang ba kin wan ban peit bad ban shim jingkheiñ ïa ki lanot ba la shah ktah ha katei ka jingwan lynshop jong u phria.
