Shillong, Lber 24
Ka Federation of Khasi Jaiñtia and Garo People (FKJGP) Central Body kum kawei na ki kynhun sengbhalang kaba don ïa ki shnat treikam ha baroh kawei ka Jylla Meghalaya ka ai khublei kyrpang ïa baroh ki MDC jong ka GHADC kiba la ïatylli mlon da kawei ka jingthmu ha kaba ki la pass ïa ka ‘resolution’ ban khanglad ïa ki bym dei ki paid riewlum ban ïakhun ïa ka ilekshon ha Council kumba la pynkupbor kyrpang ïa ki paid riewlum kiba dei ki trai ri trai muluk da ka riti synshar jong ka Ri India lyngba ka Sixth Schedule.
Ha ka kyrwoh ba la phah ha ka sngi Ba-ar jong ka taïew, ka FKJGP ha kajuh ka por ka ai burom ruh ïa ka Sorkar Jylla bad kumjuh ruh ïa u Lat jong ka Jylla kiba la kloi ban pdiang bad ban ai ka jingmynjur ban pynlong aiñ ïa ki mat jingdawa kiba shnong nongrim jong ki paid riewlum Garo lyngba ka jingïakhih paidbah kaba la ktah ruh wat ïa ka shongsuk shong shngaiñ ha kine ki khyndiat taïew kiba la leit.
Ha kawei pat ka bynta ka Federation of Khasi Jaiñtia and Garo People (FKJGP) ka sngew ba kane ka dei ka ïa bad ka por kaba biang eh ïa ka Khasi Hills Autonomous District Council (KHADC) bad ïa ka Jaiñtia Hills Autonomous District Council (JHADC) ban shim ïa kijuh ki sienjam kumba la leh bad lamkhmat da ka Garo Hills Autonomous District Council (GHADC), khnang ba kan long ka jingïada ïa ki paid Khasi-Pnar ban lait na ka jingshah knieh ïa u lakam synshar ha la ka jong ka muluk.
“Kum ka seng kaba don ïa ka jingkitkhlieh ban pynneh pynsah ïa la ka jong ka khyndew ka shyiap bad ïa ki snap tynrai jong ka riti ka dustur ka dap da ka jing sngewkhia kaba khraw namar ba ki nongwei nongar ki la dep knieh ïa u lakam lyngba jong ka Khaïi ka pateng bad lada kum ka jaitbynriew ngin shah knieh noh sa ïa u lakam ha ka Synshar ka Khadar ka la dei lypa ka jingkut jong ka lawei” la ong ka FKJGP ha ka kyrwoh.
Shuh shuh ka la kdew ruh ba ka jingbym don satia ïa ki aiñ kiba khlaiñ ban ïada bad ban khanglad ïa ki briew kiba nabar ban rung laitluid sha ka Jylla ka la dei lypa u dak jong ka jingmynsaw ïa ka jaitbynriew, kumta ka FKJGP ka sngew ba kane kan dei ka kabu ksiar ïa ka KHADC bad kumjuh ruh ïa ka JHADC ban pynjanai bad ban pynkhlaiñ ïa ki AD Rules ha kaba kum kane ka por.
Ka FKJGP ka don ruh ïa ka jingkyrmen kaba skhem ba ka Sorkar Jylla bad u Lat jong ka Jylla kin leh la ka jong ka kamram ban pynïoh ïa ka hok kaba mar ryngkat ha ka Jylla hi baroh kawei khlem da leh shiliang khmat ïa ki mat jingdawa ba shongsbai jong ka jaitbynriew.
Ka FKJGP ka ai khublei kyrpang ïa ki nongïalam jong ka FKJGP Garo Hills Zone hapoh ka jingïalam jong u President u Pritam Arengh lem bad kiwei pat ki kynhun Sengbhalang kiba la trei shitom khlem shongthait tad haduh ban da ïoh ïa u soh jong ka jingjop. Ka la ai khublei ruh ïa baroh ki paid riewlum na Rilum Garo kiba la ai shisha ïa ka jingkyrshan kaba ratbah ïa ka seng tad haduh ba na ka liang ka GHADC bad ka Sorkar Jylla ruh ki hap ban pyndem toiñ ban pynurlong ïa ki mat jingdawa.
Namarkata, ka kyntu jur ïa baroh ar tylli ki Autonomous District Council kiba kynthup ïa ka KHADC bad JHADC ba ki dei ban khot pynlong noh kloi ïa ka Dorbar Kyrpang ban pynjanai bad ban pynkhlaiñ ïa ki AD Rules khnang ba ki briew kiba nabar kin ym ïohlad satia ban mushlia ïa ka jinglong kyntang jong ka Ïing Dorbar Thawaiñ ha ki Autonomous District Council.
