Ka NPP kan pynïeng kyrtong ha ka ilekshon MP shiteng samoi, pynthikna u Bah Prestone

Shillong, Lber 24

Ka National People’s Party (NPP) kan sa pynïeng kyrtong ha ka ilekshon MP shiteng samoi na ka Shillong Parliamentary Constituency, la pynthikna u Symbud Myntri Rangbah ka Jylla u Bah Prestone Tynsong uba dei ruh u President ka NPP Meghalaya ha ka sngi Ba-ar.

“Na ka liang jong ka seng jong ngi, ngi la dep ban rai ban sei ïa la u jong u ne ka kyrtong ha ka ilekshon MP shiteng samoi ka ban sa long shen,” la ong u Bah Prestone haba kren bad ki lad pathai khubor bad bynrap “Ngin pynïeng ïa u kyrtong jong ngi ban ïakhun ha kane ka ilekshon.”

U la kyntait pat ban ïathuh ïa ka por na ka bynta ban pynbna ïa u ne ka kyrtong jong ka seng.

“Halor ka jingkylli jong phi ba kylli lano bad mano ban dei kyrtong, ïa kata yn sa pyntip ha ka por kaba biang sha phi kloi katba lah,” u la ong.

Ha kaba ïadei pat bad ka jingïatreilang bad ka BJP, u Bah Prestone um shym la pynpaw eiei.

“Ïa mynta, ka rai ka dei kaba la shim da ka NPP. Te kumta ka shong ha ki paralok jong ngi lane kano kano ka seng saiñpyrthei ban rai la kin wan ïasoh bad ngi ne em, haduh mynta ngim pat ïakren eiei halor kane. To ngin peit, kaei ka jingai jingmut jong ki bad kaei kaba ki don ha ka jingmut jingpyrkhat jong ki”, u la ong.

“Hynrei na ka liang jong ka seng jong ngi, ngi la dep ban rai ban pynïeng kyrtong na ka bynta ka ilekshon MP shiteng samoi ban wan,” u la ong.

Ka jinghap ban pynlong ïa ka ilekshon shiteng samoi ka dei hadien ka jingkhlad noh jong u MP ka VPP Dr. Ricky AJ Syngkon myn ha ka 19 tarik Rymphang.