Jowai, Lber 24
Ki samla ki dei ka jingdon jingem jong ka imlang sahlang, bad ki samla ki hap ban sngewthuh ïalade kaei ka jingsngewtynnad, ka jingkut jingmut bad ka thong jong ki, ba kin buh hakhmat khnang ba kin lah ban ïaid shaphrang ha ka jingim jong ki.
Ïa kane la pynpaw da u Myntri ka tnad pule puthi ka jylla Ma Lahkmen Rymbui haba pynhap pyrda ïa ka taiew lehkmen ne College Week jong ki samla pule ka Nongtalang College, Amlarem Civil Sun Division, West Jaiñtia Hills District ha ka jingïalang kaba la long ha building thymmai jong ka kolej ha ka 24 tarik Lber.
Haba bteng ïa ka jingkren, u Ma Lahkmen Rymbui u la ong, ïa u mawnongrim jong ka Nongtalang College la buh da u (L) Salseng C. Marak bad ka la shim por palat 30 snem ban poi sha ka jaka jong ka kaba pura.
U la ong ka jylla Meghalaya kala kiew bha ha ka jingdon jong ki samla bad ka Sorkar ka kwah ba baroh kin noh synñiang sha ka imlang sahlang ha kano kano ka dur kaba ki lah.
Haba kyntu ïa ki samla pule u la ong, ki don shibun ki sap ba buhrieh ha ki samla, nyngkong eh, ki samla pule ki hap ban sngewthuh ïalade, kaei ka jingsngewtynnad, ka jingkut jingmut bad ka thong ba ki buh hakhmat khnang ba kin lah ban ïaid shaphrang ha ka jingim jong ki.
U la ong ruh ba kum ki samla pule ki dei ban long kiba ïaishah ïa ka jingeh, bad ki jingtynjuh ha ka jingim, hynrei kita kim dei ban long ki daw ka jingshah rem, bad kyntu ruh ban ym pynlong daw ïa ka jingduk jingkyrduh hynrei ban trei shitom kumba ka Sorkar ka ïarap lyngba ka scholarship kaba ki khynnah kim dei ban pynlut kai hynrei ban ïoh pat ban kyrshan ïa ka bai pule ka jong ki.
Haba ïadei bad ka pule puthi ha ka jylla, u Ma Lahkmen u la ong ba ka Sorkar Meghalaya hapoh ka jingïalam u Myntri Rangbah u Conrad K. Sangma kala bei tyngka shibun na ka bynta ka tnat pule puthi.
U la pyntip ba ha u snem 2024-25, ka Sorkar kala siew tulop 4 klur tam tang na ka bynta ka Nongtalang College bad kumba 27 lak tyngka ka scholarship na ka bynta ki samla pule kane ka kolej.
U Ma Lahkmen u la pynpaw ruh ka jingsngewnguh ïa ka kynhun Myntri kaba la mynjur ban pynrung ïa ka Community Integrated Skills Learning (CISF) kum ka bynta jong ki jinghikai na ka bynta ki klas VI haduh X.
U Myntri u la ong ba kane ka jingthmu, ka thmu ba 50% na ki marks la ai sha ki khynnah skul kiba nang ïa kano kano ka jingtbit na ka ïing ka sem ne ka imlang sahlang jong ki.
Kane ka marks 50 percent yn pynïasoh bad ka jingtbit kiba u/ka khynnah ki kwah ban leh, ka lah ban ïadei bad ka kam ïing ka sem, kum ka shet jingshet, ka rep ka riang, kaba ailad ïa ki samla pule ban ïoh jinghikai na ki kmie ki kpa ne ki bahaïing hasem jong ki.
Nalorkata, u Myntri u la pynshlur ruh ïa ki samla pule ka thaiñ ban bteng ïa ki jingpule jong ki hapoh Nongtalang College namar kam don shuh ka jingïapher lada nujor bad ki kolej kiba sha sor. “Phi long kiba donbok shibun ban wan pule sha ka Nongtalang College, ki nonghikai ki dei kiba tbit bad ki lah ban hikai ha kano kano ka jaka bad la thung ruh ïa ki lyngba ka rukom kaba dei,” la ong u Myntri.
U Myntri u la kdew ruh ïa ki jingjop jong ka Sorkar ha ka liang ka pule puthi ha ki kyrdan kiba kham shajrong, kynthup ka jingplie ïa ka Captain Williamson Sangma State University, ka jingseng ïa ka college ha Patharkhmah, Rongjeng, Shillong Engineering College nalor ka jingthmu ban sdang ïa ka College of Architecture ha Tura, nalor ka jingshna ïa ka kolej Sorkar ha Mawshynrut bad Jalaphet kaba ka jingshna ka dang ïaid shakhmat.
U la kdew ruh ïa ka jingpynkylla halor ka scholarship skhim kiba kham mynshwa ban pynthikna ïa ka jingkyrshan kaba kham biang na ka bynta ki samla pule.
Haba ïadei bad ka surok ban poi sha Nongtalang College u Myntri u la pyntip ba la mang 36 lak.
