Shillong, Lber 24
Ka Assistant Programme Officer jong ka National TB Elimination Programme (NTEP), ka Dr. A.J Rynjah, haba kren ha ka World TB Day ka la ong kane ka sngi ka dei ka sngi kaba ngin hap ban pyrkhat bha haba ïadei bad ka jingktah jong ka jingpang TB.
Ka Dr. A.J Rynjah ka la ong ba watla don ïa ki kor ki bor jong kane ka juk mynta hynrei ka jingsumar ïa ka jingpang TB ka dang bteng bad ka dei ka jingeh ha ki paidbah haba ïadei bad ka koit ka khiah, shibun ki briew ki duh ïa ka jingim na kane ka jingpang.
Haba ïadei bad ka Jylla Meghalaya, baroh ki don kumba 4,484 ngut kiba don ïa ka jingpang TB, ka la ong.
Wat hapdeng kine ki jingeh la ka dei ha ka leit ka wan ne ka jingjngai ki shnong ka Sorkar Jylla ka la shim khia ban ïakhun pyrshah ïa kane ka jingpang, da kaba pyndonkam ïa ki kor ki bor jong kane ka juk ba mynta kynthup ïa ki AI-enabled handheld X-ray devices bad Molecular Testing lyngba ka Truenat bad CBNAAT.
“Mynta kumba, 97 per cent la leh ïa ka test ïa ka jingpang TB ha ka Jylla kaba buh ïa ka Jylla Meghalaya hakhmat duh ha ka Ri,” ka la ong.
