Shillong, Lber 24
Ka Garo Student Union (GSU) ka la kyrpad ïa u Lat ka Jylla, u C.H. Vijayashankar, ban dawa tuklar na bynta ban pynlong kongsan ïa ki syrnot Scheduled Tribe (ST) haba ïadei bad ka jingïashim bynta ha ka ilekshon sha ka Garo Hills Autonomous Dis-trict Council (GHADC).
Ka GSU ha kajuh ka por ka la kyntu ruh ïa u Lat ban pyrkhat lang ha ka ban pynkylla ïa ka ‘Para-12A’ jong ka Khyrnit ba 6 ka Riti Synshar ka Ri India.
Haba kren sha ki lad pathai khubor hadien ka jingïalang ha ka Sngi Ba-ar, u President ka GSU, u Tengsak G. Momin u la ong, “Ngi la ïakynduh ïa u Lat tang halor kawei ka mat: ban pynlong kongsan ïa ki syrnot ST na bynta ban thep ‘vote’ bad ban ïakhun ha ka ilekshon GHADC.”
Ka GSU ka la ïakren ruh ban pynkylla ïa ka ‘Rule 128’ ban pynrung ïa ki kyntien “Indigenous Scheduled Tribes of Garo Hills” bad ban pynkylla ïa ka ‘Para 12A’ jong ka Khyrnit ba 6 ban pyrkhing ïa ka jingbatai jong ka Sorkar Jylla haba ïadei bad ki kyndon jong ka District Council.
Haba aiti ruh ïa ka shithi sha u Lat ka Jylla, u President ka GSU u la kynthoh ba ka jingailad ïa ki bym dei ‘riewlum ban thep ‘vote’ bad ïakhun ha ka ilekshon GHADC ka long pyrshah ïa ka jingthmu jong ka Khyrnit ba 6 ban pynneh-pynsah ïa ka snap kyrpang jong ki ‘riewlum bad ka kolshor.
“Ngi la ïakren ruh ban pynkylla ïa ka ‘Para 12A’ jong ka Khyrnit ba 6 ka Riti Synshar ka Ri India, ka jingtyrwa kaba ngi la buddien lyngba kiba bun ki jingïalang bad ka KSU bad ka FKJGP. Ka Sorkar Meghalaya ka la batai ïa ki kyndon jong ka District Council lyngba kane ka ‘Paragraph’, kaba la pynlong ïa ngi ban kylli ïa u Lat halor ka jinglah ban pynkylla ïa ka ban pyrkhing ïa kum kine ki jingbatai,” u la bynrap.
“Ka jubab jong u Lat ka long kaba bha,” la ong u Momin.
“U la kdew ruh ïa ka Special Intensive Revision (SIR) bad hato dei ne em ban pyntreikam hashuwa ka ilekshon sha ka GHADC,” u la ong.
Shuh shuh u Lat u la pyntip ba u la ïakren halor ki jingpynkylla kiba lah ban ïaid shkhmat ha ki kyndon ba ïadei bad ka ilekshon bad u Myntri Rangbah ka Jylla, u Conrad K. Sangma, da kaba ban jur halor ka jinglong kongsan jong ki syrnot ST na ka bynta ki nongthep ‘vote’ bad ki kyrtong ka GHADC.
