Shillong, Lber 24
Hadien ar snem ka Megha -laya Cricket Association (MCA) kan sa ïoh ban shimti ban pynïaid ïa ka Indoor Cricket Academy ha madan Kurkalang, Ri Bhoi District hadien ba ka la ïoh jingkyrshan pisa na ka BCCI.
Ïa kane ka shlem ai jinghikai la buh maw nongrim na ka bynta ban sdang ïa ka jingtei ha u Jymmang jong u snem 2024 lyngba ka video conference da u President ka BCCI u Roger Binny lem bad u secretary barim ka BCCI u Jay Shah ryngkat kiwei pat ki san tylli ki jingtei ha kiwei pat ki jylla ba marjan.
Ka jingjied ka MCA ban tei ïa katei ka Indoor Cricket Academy ha madan Kurkalang ka la wan hadien ba ka Dorbar Shnong Lumdaitkhla ka la ai sngewbha ïa katei ka jaka kaba ha ka jingheh kaba 6 acre khnang ban lah ban pynlong ïa ki prokram ïalehkai ki ban ai jingmyntoi ïa ki nongïalehkai.
Kat kum ka jingthmu naduh kaba myn nyngkong la ong ba katei ka jingtei kan kynthup ïa saw tylli ki jaka kilanmet (pitch), ka pung jngi, ka gym lem bad ki kamra khreh khnang ban pynlong ïa ki jingkilanmet ki ban neh baroh shi snem.
Kumba ka long mynta ka jingtei ïa katei ka Indoor Cricket Academy ka la jan dep artad bad ki dangsah sa kumba katto katne kiba danghap ban pyndep. Shisien ba la lah ban pyndep kan long ka jingkyrkhu ïa ka Jylla hi baroh kawei na ka bynta ban sei ïa ki nongïalehkai kynthei bad shynrang ki ban paw ym tang ha ka Jylla, hynrei ha kylleng ki jylla jong ka ri bad ruh ba shisien ka sngi kin sa ïoh ban mihkhmat ïa ka ri India.
Lah ban kdew ba na ka liang ka MCA hapoh ka jingïalam u James Sangma ki la leit jurip ïa katei ka jingtei bad ki la khmih lynti ban lah ban pyndep noh ïa ka khnang ban lah ban pynlong ïa ki prokram ïalehkai.
