Shillong, Lber 24
Ha ka jingkyntiew ban ïoh kam ïoh jam ïa ki samla ha kane ka thaiñ, ka IndiGo, ka kompeni liengsuiñ kaba heh tam ha India, ka la pynlong ïa ka jingjied ne interview na ka bynta ka kam Cabin Crew ha ka jaka ai jinghikai jong ka Don Bosco Youth Centre, Laitumkhrah, Shillong. Ïa kane ka jingjied ban ai kam la pynïaid da ka Emporium Skills Trai-ning Institute (ESTI).
Ki don baroh 56 ngut ki samla kynthei na kylleng ka thaiñ Shatei Lam-Mihngi kiba la ïashim bynta ha kane ka Interview. Hadien ka jingbishar bniah, la lah ban jied tang san ngut ki kyrtong: ka Deilana Shallam, ka Mahi Sah, ka Cassandra War, ka Silveris Mary Lyndem, bad ka Ritika.
Kane ka dei ka sien kaba ar ba ka jaka ai jinghikai jong ka Don Bosco ka la pynlong ïa ka interview ban thung kam ïa ki nongtrei ha ka Cabin Crew ha ka jingïatreilang bad ka ESTI, kaba pyni ïa ka jingshakri ba bha jong katei ka centre ban pynlongbriew manbriew ïa ki samla ka Jylla ryngkat bad ka jingtreilang jong ka ESTI.
Ka Don Bosco Youth Centre, Shillong, ka la nang kiew stet kum ka jaka ba kongsan na ka bynta ban pynkupbor ïa ki samla bad ban kyntiew ïa ki sap ha kane ka thaiñ. Lyngba ki prokram ai jinghikai bapher bapher bad ki jingïatreilang bad kiwei pat ki kompeni bad ki industry, ka Centre ka la pynsuk ïa ki samla kiba bun ban ïoh kam la ha India bad shabar ri. Ka jingïatreilang jong ka bad ka ESTI ka pynskhem shuh shuh ïa ka thong jong ka ban plie lad plie lynti ïa ki samla ban ïoh ka kam ka jam.
Dei ryngkat bad kane ka jingthmu, ka ESTI kan dang bteng ban ai jinghikai ba kyrpang ha ka Centre, ban pyntbit ïa ki kyrtong da ki sap kiba ïadei bad ka kam ha palat 20 tylli ki ri ha ka pyrthei.
