Shillong, Lber 24
U Lat ka Jylla, u C.H. Vijayashankar ha ka Sngi Ba-ar u la mynjur ïa ki kyndon ba la pynkylla – kaba pynlong kongsan ïa ki syrnot ‘Scheduled Tribe’ (ST) na bynta ki kyrtong kiba ïakhun ïa ka ilekshon sha ka Garo Hills Autonomous District Council (GHADC).
“Nga ai khublei ïa u Lat badonburom uba la mynjur ïa ki kyndon ba la pynkylla, kaba pynlong kongsan ïa ki kyrtong ban don ïa ka syrnot ST ban ïakhun ha ka ilekshon sha ka GHADC,” la thoh u Myntri Rangbah ka Jylla, u Conrad K. Sangma ha ‘X’, da kaba pynskhem ïa kane ka rai.
Kane ka la wan jia shisngi hadien ba ka GHADC ba la ïalam da ka National People’s Party (NPP) ka la wanrah jingkylla ha ki kyndon jong ka ban pynlong kongsan ïa baroh ki kyrtong ban don ïa ka syrnot ‘Scheduled Tribe’, haba ïakhun ïa ka ilekshon sha ka District Council.
Kane ha kawei ka liang ka pyrkhing ruh ïa ka jingïashim bynta ilekshon jong kito ki bym dei ‘riewlum – ka sien kaba nyngkong eh naduh ba la thaw ïa ka Council ha u snem 1952.
U Myntri Rangbah ka Jylla, u Conrad K. Sangma u la ïaroh ïa kane ka sienjam bad ong ba ka long kum “ka jingsahkynmaw ha ka histori” jong ka GHADC kaba la shong ïa ka Dorbar Kyrpang (jong ka) ha ka Lah Sngi U Blei.
“…ha ka Dorbar jong ka District Council, ka Ïingdorbar ka la mynjur ïa ka rai ka ban sah kynmaw ha ka histori…ha kaba, la pynlong kongsan ïa kino-kino ki kyrtong kiba ïakhun ban don ïa ka syrnot ‘Scheduled Tribe’,” la ong u Conrad.
“Kane ka dei ka rai kaba kongsan bha…ki District Council ki dei kiba la thmu beit thik na ka bynta ki ‘riewlum jong ka thaiñ. Ka la long ka jingdawa kaba la slem bah jong ki paidbah, hynrei ha kine ki 74 snem ba la dep, ym don kawei ruh na ki Sorkar ne ki District Council kiba lah ban leh ïa kane,” u la ong.
Kane ka jingpynkylla ka pynrung ïa ka jingdonkam jong ka syrnot ha ki kyndon ilekshon jong ka GHADC, kaba khang ïa ka jingplie kaba ailad ïa ki nongshong shnong ki bym dei ‘riewlum ban ïeng kum ki kyrtong ban long dkhot ha GHADC – ka shnat treikam kaba la pynkha hapoh ka Khyrnit ba 6 ban ïada ïa ka jingsynshar hi dalade-ïalade jong ki’riewlum.
Na ka liang u Conrad, u la kyrpad ban pdiang ïa kane da ka jingjai-jai bad ong, “Nga tikna ba baroh ki paralok jong ngi ki bym dei ‘riewlum kin sngewthuh ba kane ka Council ka dei beit na ka bynta ki ‘riewlum…nga tikna ba kan don ka jingïatreilang na baroh ki liang bad baroh ngin ïatreilang ha ka jingsuk bad ka jingïatylli ban pyntikna ba ngin rah shakhmat ïa ka Ri-lum Garo, ka Jylla bad ka thaiñ baroh kawei.”
Kane ka rai ka wan ruh hadien jong ka rai ka Sorkar Jylla ban pynjlan ïa ka samoi treikam (ba mynta) jong ka GHADC da hynriew bnai hadien ki jingïakhih kiba jur da ki taïew pyrshah ïa ka jingïashim bynta jong ki bym dei ‘riewlum ha ka ilekshon sha ka Council, kaba la buh por hashuwa ban long ha ka 10 tarik u Ïaïong.
