Jowai, Lber 24
Ka Goodwill Mupliang bad ka PCC Phramer ki la lah ban pynthikna ban rung sha ka quarter final ha ka District Cricket League 2026 ba pynïaid da ka West Jaiñtia Hills District Cricket Association (WJHDCA).
Ha ka jingïalehkai kaba khatduh jong ka Pool-A kaba la long ha ka lah sngi U Blei, ka Goodwill Mupliang ka la jop da 8 wiket ïa ka PCC Phramer, katba ha ka Pool-B ka Mowkaiaw ka la pynliem noh ïa ka Dulong da 5 wiket.
Ha ka jingïalehkai ha madan Khliehtyrshi, ka Goodwill Mupliang kaba la jop ïa ka kynting pisa ka la ailad ïa ka PCC Phramer ban tied nyngkong ha kaba ka la kamai 53 run bad shah pynhap 8 wiket ha ki 14.4 over. U Kamni Suna u la tied 18 run. Napdeng ki nongkawang ball ka Goodwill Mupliang, u Defender Dhar bad u Levestar Phawa ki la khur mar 2 wiket.
Haba wan shimti ïa ka pali kaba ar, ka Goodwill Mupliang ka la kynjoh sha ka thong da kaba kamai 54 run bad shah pynhap 2 wiket ha ki 7.2 over. U Restingroy Sari u la tied 24 run bad u Richest Star Dhar u la ïoh 12 run. Ïa ka nam Man of the Match la khur da u Levestar Phawa.
Lyngba kane ka nam jop kaba saw sien lynter ka Goodwill Mupliang ka la ïoh ban bat ïa ka kyrdan ba hakhlieh da kaba kamai 8 poiñ ha ka Pool-A bad ka PCC Phramer ka la bat ïa ka kyrdan ba-ar bad ka la khur 6 poiñ. Te kumta baroh ar kine ki kynhun ki la rung sha ka quarter final.
Haba phai sha ka jingïa-lehkai ha madan Wahïajer, ka Dulong CC ka la kamai 172 run bad shah pynhap 9 wiket ha ki 31.4 over. U Amikooi u la tied 47 run bad u Sanki Pakyntein u la ïoh 36 run. Na ka liang ki nongkawang bol ka Mowkaïaw, u Todan Rymbai u la khur 3 wiket bad ïa ki 2 wiket la ïoh da u Sandabiang Lathong.
Haba wan shimti ïa ka pali kaba ar, ka Mowkaïaw CYC ka la kynjoh ïa ka thong da kaba kamai 173 run bad shah pynhap 5 wiket ha ki 22 over. U Ardakirang Rymbai ula tied 55 run bad u Kitboklang Lyngdoh (not out) u la ïoh 43 run. U Ram Najiar u la khur 2 wiket na bynta ka Dulong. Ïa ka nam Man of the Match la khur da u Todan Rymbai.
Lyngba kane ka nam jop, ka Mowkaïaw ka duh rung sha ka quarter final hadien ba ka la wan ha ka kyrdan balai bad kamai 4 poiñ. Te kumta ki kynhun kiba la rung na ka Pool-B ki long ka Ummulong SC bad ka Wahïajer hadien ba ki la kamai 7 bad 6 poiñ.
