Shillong, Lber 24
Ka Laitjem CC bad ka Seng Samla Mawriang Mawlong ki la jam sha ka quarter final ha ka lympung ïalehkai 5th District League T20 Cricket Tournament 2026 ba la pynlong da ka East Khasi Hills Cricket Association ha ka sngi Ba-ar.
Ha ka jingïalehkai kaba khatduh jong ka Group-A kaba la long ha madan Saitsohpen kaba ha Sohra, ka Laitjem CC ka la pynliem noh ïa ka Sportopia SCC da 93 run na ka bynta ban bat ïa ka kyrdan ba-ar bad kamai 7 poiñ, kata hadien ïa ka Cricket Smit (10 poiñ) kaba la ïoh ban lamkhmat.
Ka Laitjem kaba la shimti ban tied nyngkong, ka la kamai 229 run bad shah pynhap 7 wiket ha ki 20 over. U Ganeshstar Syiem u la tied 43 run na ki 18 bol. Katba u Lurshai Wahlang u la khur 4 wiket na ka bynta 72 run ha ki 4 over.
Hynrei ka Sportopia kam shym la lah ban kynjoh sha ka thong ha kaba ka la kamai 137 run bad shah pynhap 7 wiket ha ki 20 over. U Yankie Dunai u la tied 39 run na ki 38 bol. Katba u Ganeshstar Syiem u la khur 2 wiket na ka bynta 8 wiket ha ki 3 over bad u la ïoh ruh ïa ka nam Player of the Match.
Haba phai sha kawei pat ka jingïakhun jong ka Group-C, ka Seng Samla Mawriang Mawlong ka la jop da 57 run ïa ka Superkings (Sohïong) CC na ka bynta ban long ka kynhun kaba ar ban ïoh rung na kane ka group da kaba kamai 8 point hadien ïa ka Laitkynsew (10 poiñ), kaba la bat ïa ka kyrdan ba hakhlieh.
Ha kane ka jingïakhun, ka Seng Samla Mawriang Mawlong ka la kamai 145 run bad shah pynhap 5 wiket ha ki 12 over. U Gibon Singh u la tied 35 run na ki 24 bol. Katba u Bankerlang Syiemïong u la khur 3 wiket na ka bynta 30 run ha ki 3 over.
Hynrei ka Superkings (Sohïong) kaba la wan beh ïa ka thong, ka la kamai tang 88 run bad shah pynhap 9 wiket ha ki 12 over. U Aibor Kharjana u la tied 23 run na ki 18 bol. Katba u Stevenson Lynrah u la khur 2 wiket na ka bynta 6 wiket ha ki 1 over. Ïa ka nam Player of the Match la khur da u Gibon Singh.
Kiwei pat ki kynhun kiba la rung sha ka quarter final ha ka Group-B ki long ka Friends United CC kaba la kamai 6 poiñ bad ka Sohra Combine CC (5 poiñ) kaba la wan ba-ar. Ha ka Group-D ki long ka Mawphlang kaba la kamai 6 poiñ bad ka Saitsohpen (5 poiñ) kaba la wan ba-ar.
