New Delhi, Lber:
Ka ïingdorbar thawaiñ jong ka Delhi bad u Lamphang jong ka, u Vijender Gupta, sa shisien, ki la ïoh ïa ka jingbyrngem shah pynbthei bom lyngba ka email, kaba la pynmih ïa ka jingsngewkhia kaba jur ha ka nongbah jong ka ri. Kane ka jingjia, ka la jia ha ka sngi ba la buh ban wanrah ïa ka mang tyngka jong ka Delhi.
Katkum ki tyllong khubor, la ong ba la phah ïa ka email kaba byrngem sha ka ïingdorbar ha ka por kumba 7:28 baje mynstep, kaba maham ïa ka jingpynbthei bom kaba lah ban jia. La ïoh ïa ka email ba kyrpang ha ka por 7:49 baje mynstep ha ka official email ID jong u Lamphang.
Ka jingma ka la pur shabar jong ka Assembly complex, ha kaba ka Vidhan Sabha Metro Station kaba don marjan ruh la kdew kum ka thong kaba lah ban mih na ka jingbthei bom.
Naba jur ka jingsngewkhia jingmut halor kane ka jingjia, la ïathuh ba katei ka email, ka la jer kyrteng ïa ki katto katne ngut ki nongïalam ba pawkhmat, kiba kynthup ïa u Myntri Rangbahduh ka ri, u Narendra Modi, u Amit Shah, Myntri ka tnat ki kam poh ïing jong ka sorkar pdeng, u S Jaishankar, Myntri korbar ri bad u Lieutenant Governor jong ka Delhi, u Taranjit Singh Sandhu.
La jer kyrteng kyrpang ruh ïa ka Myntri Rangbah ka Delhi ka Rekha Gupta bad ïa u Myntri ka Cabinet u Manjinder Singh Sirsa.
Ki jingthoh ha ka email ki kynthup ïa ki ktien byrngem bad ki kyntien ban wanrah ïa ka jingïakynad, la pynshisha ba ki kyntu ïa ki nongïalam ban “ïada ïalade” bad ki kdew ruh ïa ka jingai jingkyrshan ïa ka Khalistan.
La ïathuh ba ka kynhun kaba pynithuh ïalade kum ka “Khalistani National Army” ka la pynmih ruh ïa ki jingbyrngem pyrshah ïa ka Myntri Rangbah ka Delhi, ïa ka kynhun Myntri ba mynta, bad ïa u Lieutenant Governor.
Ki kynhun pahara ki la sdang ïa ka jingtohkit kaba bniah ban lap ïa ka tynrai jong kitei ki email.
La pynjari ïa ki kynhun pynduhbor ïa u bom bad ki kynhun pulit hapoh bad sawdong ka jaka jong ka Assembly bad ki jaka ba marjan, katba la pynkhlaiñ bha ïa ka jingpahara ha ki jaka buh bom ba kongsan ha kylleng ka nongbah Delhi.
Ki heh sorkar ki dang wad bniah ban tip la kane ka jingbyrngem ka dei kaba shisha ne kaba thok.
