Shillong, Lber 24
U Bah Chandame Sungoh, Chairman Ka Hynñiewtrep Border Dispute Redressal Forum (HBDRF) u la ong ba ka shem jingeh bha ban pynbeit ïa u pud u sam bad ka Assam namar ba ki don ki Khasi-Pnar kiba leit thep vote sha Assam haduh mynta.
Haba kren sha ki lad pathai khubor ha ka 24 tarik u Lber 2026, u Bah Chandame u la ong ba ha ka ilekshon MLA, MP, MAC ha Assam, ki don ki briew na ka Jylla Meghalaya kiba leit kanbas ilekshon na ka bynta ki party bad ki kyrtong hapoh Assam bad dei kine hi ki Khasi-Pnar kiba pynbor ïa ki briew kiba shong ba sah ha ka thaiñ Block 1 bad Block 2 ban thep vote shapoh Assam.
U la ong ba naduh u snem 2021 ki la rai bad pynskhem ban pyndonkam da ka Non-Cooperation Movement bad ka Karbi Anglong Assam, kumjuh ruh ha ka 14 tarik u bnai Rymphang 2026, ki la rai ban ‘boycott’ ïa ka ilekshon MLA ha ka jylla Assam ka ban sa long shen.
“Ngi la ‘boycott’ haduh ar tylli ki ilekshon ha Assam, ba kynthup ïa ka ilekshon MAC bad ka ilekshon MP, bad mynta ki la rai ban boycott sa ïa kane ka ilekshon MLA ha Assam ka ban sa long shen,” la ong u Bah Chandame.
U la kyntu ïa kito kiba ju pynbor ïa ki Khasi-Pnar ban thep vote ha Assam ba ki dei ban sngewthuh ba katei ka jaka ka dang don hapdeng ka jingïakajia pud bad na ka liang ki nongshong shnong ha katei ka thaiñ ruh ki la kren shai ba kim kwah ban leit shim bynta ha kane ka ilekshon ka ban sa long shen ha Assam.
Nalorkata, u la kyntu ruh ïa ki Khasi-Pnar ba shong ba sah ha kitei ki thaiñ ba kim dei ban ngop ha ka jingpynbiej jong kiwei pat ki jaidbynriew.
“Ka jingbym shimkhia ka Sorkar Jylla ban ithuh noh ïa ki shnong ha ka thaiñ Labang Nongphyllut, ki briew ka Assam ki suk bha ban pynbiej bad pynngop ïa ki nongshong shnong namar ba kim don ïa ka Epic, ki Adhaar, ki Birth Certificate, ki ST bad kiwei-kiwei de,” la bynrap u Bah Chandame.
U la ong ruh ba ki la dep rai ban nym thep vote shuh ha Assam, hynrei watla katta ki dang don pat ki ‘langïong bad ong “Lyngba jong kine ‘langïong kiba mih na ka kynhun jong ngi hi, kine ki briew na Assam ki sa ïoh lad. Da kaba ong ruh ba kine ki langïong kim dei ban leit pynshoi ïa ki briew jong ngi (Khasi-Pnar) ban leit thep vote sha Assam.”
“Naduh mynshuwa ngi la dep ban ïakren halor kane ka kam bad ngi la dep ban ïakynduh ruh wat ïa u Myntri Rangbah ka Jylla u Conrad K Sangma hynrei haduh mynta um shym la leh ei-ei ne pynbeit, da kaba kynnoh ruh ba dei ka jingleh sting ka Sorkar Jylla ba haduh mynta kam shym la pat ithuh ïa ki shnong ha katei ka thaiñ. Namarkata, ka la dei ka por ba ngin mih ban ïakhih ban pynsngew sha ka Sorkar khnang ba kan shimkhia ban ithuh noh ïa ki shnong kiba don ha katei ka thaiñ,” u la ong shuh-shuh.
