Bengaluru, Lber:
“Ki paidbah ki don ka jingshaniah ha ka Congress, kumba ngi bat ïa la ka ktien.Ngi don ka jingngeit skhem ban jop ha ki ar tylli ki elekshon shiteng samoi sha Davanagere South bad Bagalkot”, la ong u Myntri Rangbah ka jylla u Siddaramaiah hangne ha ka lah sngi U Blei.
Hadien ba u la synran lang ïa u kyrtong ka Congress na Davanagere South Assembly konstitwensi, u Samarth Shamanur, u la ong, “u Shamanur Shivashankarappa (u kpa tymmen jong u Samarth) u la long MLA la hynriew sien na Davanagere South. U khun jong u, u SS Mallikarjun, uba long u Myntri, u la shahjied la arsien. Ka seng Congress ka long ka ba khlaiñ ha Devanagere South naba u Shamanur Shivashankarappa u la leh bad wanrah shibun ki projek ban wanrah ïa ka roi ka par kum u Myntri, u MP bad kum u MLA, ïa kaba ka long kaba tikna na ka bynta u kyrtong ka seng Congress ba un ïoh ïa ka jingjop.”
U la ong ba katkum ka rukom jong ka Congress, ha kaba la ai tiket sha kiba haïing jong u nongïalam ba la khlad noh, ka seng ka la pan ïa u Samarth ban ïakhun.
Kumjuh ruh kaei kaba pynthikna ïa ka jingjop jong u ka long ka jingpyntreikam kaba paka ïa ki skhim ai jingbit ha ka thaiñ.
“Ka Congress ka la pyndep shibynta ïa ki jingkular ba la ai shwa ka elekshon, lada peit ïa ka mang tyngka, ka paw shai ba ngi leh ïa kaei kaba ngi ong”, u la ong.
“Ha ka elekshon shiteng samoi kaba la dep ha Shiggaon, Channapatna bad Sandur konstitwensi, ngi la jop da ka jingjop kaba khraw, ha Channapatna da 25 hajar vote, ha Sandur 9 hajar bad ha Shiggaon 12 hajar, kane ka pyni shai ba ngi jop ïa ki ar tylli ki elekshon shiteng samoi”, u la ong.
U Siddaramaiah u la ong ruh ba un sa ïashim bynta ha ka jingïalap elekshon naduh u bnai Ïaïong.
Halor ka jingkam jong ka BJP ba ka elekshon shiteng samoi ka dei ka lad sha ka jingjop jong ka BJP ha u snem 2028, u la ong ba ki elekshon shiteng samoi ruh ki la don ha ki por ba la dep ruh, hynrei u khun jong u Myntri ka sorkar pdeng u H.D Kumaraswamy u Nikhil Kumaraswamy u la shahrem ha Channapatna bad u khun jong u Myntri Rangbah barim u Basavaraj Bommai u la shahrem ha Shiggaon. Haba kylli hato ka Congress ka pynshlur ne em ïa ka saiñ pyrthei ha ka longïing, u la ong, “Em, la pynïeng ïa u kyrtong ba la jied da kawei ka sur da ki nongbud jong ka seng.”
Ki don haduh 39 ngut ki kyrtong kiba la thep 45 tylli ki kyrteng na ka bynta ka Davanagere South Bypoll.
Ka jingthep vote kan long ha ka 9 tarik, Ïaïong bad ka jingñiew vote kan long ha ka 4 tarik, Jymmang.
