Jakarta, Lber:
U President ka Indonesia, u la kulmar khlieh hadien ka jingshah kynthoh jong u halor ka jingmynjur ban iasoi ia ka ‘Board of Peace’ jong u President ka US- u Donald Trump bad u la ong ba ka ri jong u, kan ym siew ia ka bai rung ha katei ka board kaba la buh dor ban siew $1 Billion kum ki dkhot jong katei ka ‘Board of Peace’.
Ka Jakarta ka la leh tang ïa ki shipai pynneh jingsuk na ka bynta kane ka jingthmu, ong u Prabowo Subianto ha ka kyrwoh ba la pynmih ha ka channel jong ka Presidential YouTube ha ka sngi U Blei.
Ka “Board of Peace” ka la wan lang hadien ba ka sorkar jong u Trump, kaba iatreilang bad ka Qatar bad ka Egypt, ki la iakren ban sangeh iasiat ha u Risaw ban pynsangeh ia ka thma kaba ar snem ha Gaza.
Ki ri kiba kwah ban long ki dkhot ba pura ki dei ban siew $1 billion – kaba la pynmih ïa ka jingkynthoh ba ka board ka lah ban kylla long ka rukom “siew ban ïalehkai” jong ka UN Security Council.
U Prabowo, uba dei u jeneral barim, ula ngat ha ka jingshah kynthoh na ki kynhun Muslim jong ka Indonesia, namar ba ula pyniasoh bad katei ka board bad ula kular ban phah 8,000ngut ki shipai pynneh jingsuk sha Gaza.
U Prabowo, u la leit ban iashim bynta ha ka jingialang nyngkong jong ka “Board of Peace” ha Washington, ha ka taiew ba ladep.
Hynrei hadien u la ong ba un weng noh ïalade na ka board lada kam wanrah jingmyntoi ïa ki nong Palestine lane kam ïahap bad ki jingmyntoi jong ka ri jong ka Indonesia.
“Ngim ju ong ba ngi kwah ban noh synniang $1 billion”, la ong u Prabowo ha ki kyrwoh ba la pynlait paidbah ha ka YouTube channel jongu ha ka sngi U Blei.
U la ong ba um shym la ai kano kano ka jingkular pisa “satia”.
U Prabowo, u la soi ia ka jingiateh khajna bad ka US, ha u bnai ba ladep, hynrei u la ban jur ha ka Sngi U Blei, ba ka Indonesia, ka lah ban weng noh ia kano kano ka jingiateh, lada ki kyndon ne ka jingpyntreikam jong ka, ka buh jingma ia ka jingmyntoi jong ka ri.
Ka jingïakren bad ka Washington halor kano kano ka kam pynneh ïa ka jingsuk sha Gaza la buh “ha ka jingsangeh”, katkum ka tnad pathai khubor jong ka jylla Antara, da kaba kdew ïa u nongaiktien jong ka tnad kam bar ri, u Vahd Nabyl Achmad Mulachela.
