Shillong, Lber 24
Ka Sorkar Jylla kala sdang pynkhreh ban shna la ka jong ka Electoral Roll na ka bynta ka Garo Hills Autonomous Dis-trict Council (GHADC) hadien ba u Lat ka Jylla CH Vijayashankar u la ai jingmynjur ïa ka ‘amendment’ ba khang ïa ki bym dei riewlum ban ïakhun ïa ka ilekshon ka Council.
U Symbud Myntri Rangbah ba khmih ïa ka tnad District Council Affairs (DCA) Bah Prestone Tynsong u la pynthikna ha ka sngi Ba-ar ba ka Sorkar kan sa thoh sha ka Khasi Hills Autonomous District Council bad Jaiñtia Hills Autonomous District Council, ba kyntu ïa ki ba kin pynkylla noh ïa la ki jong ki Rules.
Haba ïakren bad ki nongthoh khubor, u Bah Prestone u la ong, ka Sorkar kan nym weng ïa ka rai pynjlan ïa ka samoi treikam ka GHADC ba hynriew bnai watla u Lat u la ai jingmynjur.
“Em, ai ba ngan batai sha phi, ngi sngewnguh ïa u Lat uba la ai jingmynjur ïa ka ‘amendment’ bala mynjur da ka GHADC ba ïadei bad ka Rule 8 ha kaba la bujli ïa ka kyntien “Tang ki Scheduled Tribe”. Mynta ka sngi u Lat u la ai jingmynjur ïa ka bad mynta ka ‘amendment’ kala treikam,” u la ong.
U la batai ka kam kaba dei ban leh mynta ka long ban khmih bniah biang ïa ka kyrteng ki nongthep vote.
“Ngi hap ban khmih bniah biang ïa ka Electoral Roll. Lashai, ngan sa lum ïa ka jingïalang ban ïakren bniah bad ngan sa ai jingbthah ba donkam sha ka GHADC,” bynrap u Bah Prestone.
Haba kylli la ka donkam ka Electoral Roll la ka jong, u la jubab “Hooid, ka Electoral Roll la ka jong ka long kaba donkam ïa ka GHADC. Ka long kaba donkam namar ha Khasi bad Jaiñtia District Council, ngi don ïa ka Electoral Roll tang jong ki riewlum. Mynta da kane ka ‘amendment’, ngi hap ban pyntreikam ïa ka kumba leh ha Khasi bad Jaiñtia”.
U Bah Prestone u la ong, ka Sorkar kan sa phah da ka jingthoh sha ka KHADC bad JHADC ba kan mynjur lem ïa kum kane ka kyndon.
“Shen ngin sa thoh shithi na ka Sorkar sha ka KHADC bad JHADC ba ki dei ban pynkylla ïa kajuh ka clause 8 jong ka AD Rules bad phah sha u Lat ba un ai jingmynjur,” u la ong.
