Bhubaneswar, Lber:
U Myntri Rangbah jong ka Odisha u Mohan Charan Majhi u la pynbna ba ki la don satang 15 ngut ki dkhot jong ka kynhun lehnoh Maoist kiba dang treikam ha ka jylla ha kaba ka jingbuh thong jong ka sorkar pdeng ban pynduh pyndam ïa ki ka la sah sa tang shi taïew.
Haba jubab ïa ka jingkylli jong u heh nongïalam jong ka seng Congress u Tara Prasad Bahinipati, u Majhi u la ong hapoh ka Ïingdorbar ba ki don kumba 15 ngut ki Naxal kiba dang treikam ha ki katto katne ki jaka ha ki thaiñ khappud jong ki distrik Kandhamal-Kalahandi-Rayagada.
Katkum ka skhim pynlut pisa kaba ïadei bad ka jingïada (SRE) jong ka sorkar pdeng, tang ka Kandhamal kaba la buh mynta kum ka jaka ba shah ktah ha ki Maoist bad 8 tylli kiwei pat ki jaka ki long ki Boudh, Balangir, Kalahandi, Bargarh, Malkangiri, Nabarangpur, Nuapada bad Rayagada kiba la kheiñ kum ki jaka ba la buh pateng bad ba la shah ktah bha.
Ka kynhun barit jong ki Naxal ki don ha ki jaka khappud jong ka Kandhamal-Kalahandi-Rayagada, bad baroh kiwei pat ki distrik mynta ki la lait lut na ki kam pyntriem jong ki lehnoh, u la ong.
Katkum ka polisi aiti bad pynbha pat jong ka sorkar jylla, la ai jingïarap pisa, ka ïing ka sem, ka bai bylla man u bnai haduh 36 bnai, ki lad kamai, ka jinghikai ban pynroi ïa ki jingai jinghikai bad ki card ba ïadei bad ka jingpynïoh ïa ki jingsumar bad jingbam sha ki Maoist kiba dang buh tiar ïaleh, la ong u Majhi.
Hapdeng u snem 2024 haduh ka 15 tarik Lber, 2026, kumba 96 ngut ki Maoist ki la pyndem wait hakhmat ki pulit ka Odisha. Ki pulit jong ka jylla ki la maham ba lada ki Naxal kiba dang sah kim wan shakhmat jong ki shwa ka 31 tarik u Lber, kin ym ïoh hok ban ïoh ïa ki jingmyntoi na ka polisi pynbha jong ka sorkar.
Ki tyllong khubor na ki pulit ki ïathuh ba u dkhot jong ka Special Zonal Committee u Sukru bad arngut kiwei pat ki Maoist kiba wan na katei ka jylla ki dang hap ban aiti noh. Nalor jong ki, sa 12 ngut kiwei pat kiba kham bun ki dei na ka Chhattisgarh ba marjan, kiba la trei kam ha Odisha bad mynta ki la leit shapoh khyndew.
“Ïa ki kam la pynjur namar ba katto katne ngut ki Naxal kim shym la pynhap ïa ki tiar ïaleh jong ki. Ngin sa pynurlong ïa ka thong jong ka sorkar pdeng ban pynkut noh ïa ki kam pyntriem jong ki lehnoh haduh ka 31 tarik u Lber,” ong u ADG ka Anti-Naxal Operations u Sanjeeb Panda.
