Shillong, Lber 25
Ka Khun Hynñiewtrep National Awakening Movement (KHNAM) ka la ai por hapoh shiphew sngi ïa ka Executive Committee kaba la ïalam da ka Voice of the People Party (VPP) ha KHADC ba kan pynkylla noh ïa ka AD Rule 128 ban nym shah ïa ki bym dei Khasi ban ïashimbynta ha ka ilekshon MDC.
Kane ka jingaipor ka KHNAM ka dei hadien ba kim shym la ïoh ban ïakynduh ïa u Chief Executive Member (CEM) ka KHADC u Bah Winston Tony Lyngdoh hynrei ki la buh da ka jingthoh sha ki nongtrei ban pynpoi sha u CEM.
Haba ïakren bad u Bah Thomas Passah uba dei u Working President ka KHNAM u la ong, ka seng naduh u snem 2014, kila dawa ïa kane ka mat bad mynta ka la donkam kyrkieh ban pynkylla noh ïa ka AD Rule 128.
U Bah Thomas u la ong ba shibun tylli ki shithi ki la ai bad bunsien ki la wan ban ïakynduh kumta na ka liang ka seng ka la aipor 10 sngi ban khot ïa ka dorbar kyrpang ban pynkylla ïa ka AD Rule 128 ban nym shah ïa ki bym dei Khasi ban ïashimbynta ha ka ilekshon MDC.
U la ong ba ka GHADC kaba la dep wanrah ban pynkylla ïa ka AD Rule hynrei hapoh ar sngi u Lat ka Jylla u la mynjur ïa ka aiñ ban nym shah ïa ki bym don Schedule Tribe ban ïakhun ilekshon.
U la pynkynmaw biang ba ka AD Rule ka don la ka jong ha ki lai tylli ki District Council hynrei ym lah ban leh lang ïa ka juh.
