Shillong, Lber 25
U Myntri Rangbah ka Jylla Conrad K Sangma ha ka sngi Balang u la ïaroh ïa ka jingïatreilang hapdeng ka Trinamool Congress (TMC) bad ka National People’s Party (NPP) ha Garo Hills Autonomous District Council (GHADC) kaba long ruh kum ka khubor kaba khlaiñ ba ki seng saiñpyrthei bapher-bapher bad ki nongïalam ki lah ban klet ïa ka jingsngew seng haba phai sha ka bha ka miat jong u paidbah.
Haba kylli la kane ka jingïatreilang kan lah ban neh slem, u Conrad u la ong, “Ïa mynta hi, Nga dei ban ong ba nga kmen ban ïohi ïa kane haba buh shadien ïa ka jingsngew ïapher seng ne ïapher kyrdan, ka TMC bad MDC jong ka TMC bad ki Nongïalam jong ka TMC bad ruh katto katne ki MDC shimet, kila ïawanlang na ka bynta ka hok ki paidbah bad ki jingsngewkhia u paidbah khamtam ki paid riewlum ka Ri-lum Garo”.
U la bynrap “Kumta, kane ka dei kaba itynnad bad ka khubor kaba khlaiñ sha ki paidbah ka Ri-lum Garo ba ynda dei hi u paidbah, ki seng saiñpyrthei bapher-bapher bad ki nongïalam ki klet ïa ka jingsngew seng bad peit ïa kaei kaba bha tam na ka bynta u paidbah ka Jylla. Nga sngew ba kane ka dei ka nuksa kaba biang eh”.
U Conrad u la pynpaw ïa ka jingsngewnguh ïa ki MDC ka TMC, ki MDC shimet bad ki nongïalam ka seng namar ka jingkyrshan jong ki, kaba lam sha ka jingmynjur ïa ka amendment jong ka AD Rules, kaba pynlong kongsan ïa ki kyrtong ba kin don ïa ki syrnot Scheduled Tribe (ST) ba kin ïakhun ilekshon.
Ka rai ban pynkylla ïa ka AD Rules kala wan jia ruh hadien ba ka Sorkar Jylla kala rai ban pynjlan ïa ka samoi treikam jong ka GHADC da hynriew bnai, kaba la mih hadien ka jingïakulmar ba neh palat taïew pyrshah ïa ka jingïoh ïashimbynta ki bar jylla ha ka ilekshon ka Council, kaba la buh nyngkong ban pynlong ha ka 10 tarik Ïaïong.
