Bhubaneswar, Lber:
U Myntri Rangbah jong ka Odisha u Mohan Charan Majhi ha ka lah sngi U Blei u la pyntip sha ka ïingdorbar ba palat 53 hajar tylli ki kam runar pyrshah ïa ki kynthei la ïoh jingtip ha ka jylla hapdeng u bnai Jylliew, 2024 haduh ka 7 tarik Lber, 2026.
Ha ka jingthoh jubab halor ka jingkylli, u Myntri Rangbah u la ong ba katba ha kane ka por ba 18 bnai ki la don haduh 4,713 tylli ki kam leh beijot, hynrei ha kane ka por la lap ba ki don 212 tylli ki kam pyrshang ban leh beijot.
U la ong ba la buh jingujor 7,504, 8,814 bad 270 tylli ki mukotduma jong ka jingpynshitom beiñ wat lada kam dei na ka daw ka Dowry bad ka jingpynïap ïa ki kurim na ka daw ka jingbym siew Dowry ba la buh jingthoh ha kine ki por.
Da kaba pynpaw ba la buh jingujor haduh 11,502 tylli ki kam rahbor ha ki 18 bnai, u Myntri Rangbah u la ong, la buh jingthoh 12,531 tylli ki jingmudui halor ki kam jrongkti, 1,869 tylli ki jingthombor ïa ka longrynïeng jong ki kynthei bad 2,673 tylli ki jingthombor ban sloit ïa ki jaiñphong ha ki jaka paidbah.
Haba ai ïa ki jingkheiñ ba ïanujor jong u snem 2025 bad 2024, u la ong ba ki don 32,687 bad 30,958 tylli ki jingjia ba la ïoh jingtip ha kine ki snem. U la ong ba wat la ka don ka jingkiew khyndiat ha ka jingshah lehbeiñ ha u snem 2025 hynrei ka jingshah leh beijot ka la hiar na ka 3,054 sha ka 2,994.
