Washington, Lber:
U President ka United States, u Donald Trump, ha kane ka kynti u la pynbna ba ka US ka la dep jop ia ka thma, pyrshah ia ka Iran bad ba ka tnat shipai duriaw bad shipai suiñ jong ka Iran ka la khyllem hakhmat ki shipai ka US.
Haba ai jingkren ha ka jingpynbam smai ka tnat Homeland Security, u Trump u la ong ba ka US ka dang don hapdeng ka jingiakren bad ka Iran bad ki kam- ki jam baroh ki dang ïaid beit- ïaid ryntih katkum ki jingpynbeit jong ka US. Hynrei u la ong ba ka pyrthei baroh kawei ka iohi hi ia ka jingshisha, ba ka tnat ïada suiñ bad duriaw jong ka Iran, ka la khyllem bad kam don bor shuh mynta.
Kumta, u la ong ba ka US ka la don jingkyrmen lypa ba ka Iran kan hap sa tang ban shu kohnguh beit da kaba suk ia ki jingdawa bad jingiakren bad ka US. Namarkata, u Trump u la ong ba u ithuh shai ba kane ka thma ka la kut. Watla katta, u la ong ba um pat lah pat ban pyntikna la ka thma kan kut noh syndon ne kan sa bteng biang bad ka shong ha ka jingshim rai jong ka Iran lada kam kohnguh ia ki jinglam lynti bad jingpynbeit jong ka US.
