Shillong, Lber 25
U Myntri Rangbah ka Jylla u ba dei ruh u President ka National People’s Party u Conrad K Sangma u la pynshai ba ka jingbuh ïa ka kyrteng jong ka Agatha Sangma kaba dei ka Chairperson jong ka Meghalaya State Commission for Protection of Child Right ha ka thup kyrteng kum ka nongïalap ilekshon ba hakhmat ka dei kaba bakla.
Haba kren sha ki nongthoh khubor ha ka sngi Balang, u Conrad u la ong, ba ka Agatha ka la phah jingtip ha u ba kam treh ban ïalap ilekshon hynrei dei namar ba ka don ka jingïasngewthuh bakla, ïa ka kyrteng jong ka la kynthup lang bad u la pyntip ba ka party ka la thoh sha ka Election Commission ban weng noh ïa ka kyrteng jong ka na katei ka thup.
Shuh- shuh u la ong, ban ïatip lang baroh, ka Agatha ka la dep ïathuh ïa u naduh kaba sdang ba kam treh ban ïalap ilekshon namar kam long ka por kaba biang ba kan long kum ka nongïalap ilekshon.
U la ong ba ki don ki katto katne ki jingbym bit bymbiang ba ka kynhun ïalap ilekshon jong ka party ka khlem ïakren bha bad ki kum buh ïa ka kyrteng jong ka Agatha namar ka la dei kawei na ki nongïalam ba la rangbah jong ka party bad ki dang pyrkhat ba ka long kaba biang ban long ka nongïalap ilekshon bad u Conrad u la pynthikna ba ka party kan shimkhia ban pynbeit ïa kane ka jingbakla.
