Shillong, Lber 25
U Myntri Rangbah ka Jylla u Conrad K Sangma u la ïathuh ba ka kynhun Myntri ka la mynjur ban tei noh ïa ka Film City ha Shillong bad ban buh ruh ïa ka Film Institute ban kyntiew ïa ki kam shna phlim hapoh ka Jylla.
U Conrad u la ïathuh ba ïa kane ka Film City u la tyrwa ha ka kynhun Myntri ha kine ki ar taïew ba la dep bad mynta ki dang wad ïa ka jaka.
U la ong ba Film City ha Shillong kan kyntiew ïa ki nongak phlim bad ïa ki nongshna phlim hapoh ka Jylla bad ha ka thaiñ Shatei Lam-Mihngi.
U Conrad u la pynpaw haba u ai jingkren haba plie ïa ka Shillong International Film Festival 2026 kaba la pynïaid da ka Directorate Information & Public Relation jong ka Sorkar Jylla kaba nyngkong kaba la sdang ha ka sngi Balang bad ka ban kut ha ka 27 tarik mynta u bnai kaba la long ha State Convention Centre Shillong.
U Conrad u la ïathuh ba shiteng na ki nongshong shnong ki dei kiba hapoh 20 snem kumta ka Sorkar ka buh ïa ka thong ban plie ki lad ki lynti ïa ki samla. “Ka long kaba jwat shisha ban thaw ki lad ki lynti ïa ki samla namar ki don ha la ki jong ki sap hynrei kaei kaba ka Sorkar ka leh ka don jingkyrmen ba ka jingangnud kan urlong,” u la ong.
Shuh shuh u la pyntip ba dei tang ka Sorkar Meghalaya kaba nyngkong kaba plie ïa ka OTT ban ïarap ïa ki nongshna phlim bad ban kyrshan pisa ïa ka kam ba ki trei.
U la pyntip ba ka Chief Minister Meghalaya Grassroots Music Programme ka la aikam haduh hynñiew hajar ngut ban rwai ha kylleng ka Jylla ha kaba ka Sorkar ka la pynlut haduh 35 haduh 40 klur tyngka ban kyrshan ïa ki.
Ha kane ka sngi la ïoh jingkren ruh na u Myntri ka tnad Information and Public Relation Bah Lahkmen Rymbui, u Shakil P Ahammed, Chief Secretary ka Jylla ha ka jingïadonlang ki nongak phlim, nongshna phlim bad ki samla pule.
Ha kane ka tamasa pyni nam ïa ki phlim, ki don ar tylli kiba nabar ka ri kata na Bhutan bad Vietnam, katba napoh ka Jylla Meghalaya ki don kumba 9 tylli ki phlim kynthup lang ïa ki phlim ba lyngkot.
