Mairang, Lber 25
Ka District Magistrate jong ka Eastern West Khasi Hills District lyngba ka kyndon aiñ 163 BNSS, 2023 ka la pynmih ïa ka hukum ban khang ïa ka jingïaid ki kali heh na ka surok kaba ïaid na Nongkhlaw – Kynrud sha Nongkrem.
Ha ka kyrwoh khubor ka District Magistrate kala pynpaw ba ka jingpynmih ïa kane ka hukum ka dei namar ba kane ka surok ka dang don hapdeng ka jingmaramot bad ba ka kam ban maramot ïa ka surok ka dang ïaid.
Shuh shuh kala ong ruh ba ka jingpynmih ïa kane ka hukum, ka long hadien ka jingïoh jingtip ba ki don ki kali heh kiba ïaid man ka sngi na ka surok Nongkhlaw – Kynrud sha Nongkrem, kaba la wanrah ïa ka jingwit bad jingthut ïa ki nongpyntrei ïa ka surok bad ruh kaba la wanrah ïa ka jingjulor jong ki bynta ka surok kiba dang shu dep ban maramot.
Ka District Magistrate kala ong ruh ba ka jingïaid ki kali heh ka la pynthud ruh ïa ki paidbah khamtam ki khynnah skul bad ki kali kit nongpang kiba kit ïa ki nongpang ban poi kyrkieh sha ki jaka sumar.
Shuh shuh kala ong ruh ba lada lap ïa kino-kino kiba ïaleh pyrshah bad pynkheiñ ïa kane ka kyndon aiñ kin ngat ha ka jingshah pynshitom katkum ka Section 223 jong ka BNSS, 2023.
