Shillong, Lber 25
Ka long ka burom kaba khraw ïa ka Jylla hi baroh kawei ha kaba ka ‘thei ïalehkai kaba na Ri Bhoi District, ka Anrisha Klein ka la lah ban khur ia ka takma rnong ha ka 1st Indoor Athletic Champion -ship 2026 kaba la long ha Bhubaneswar, Odisha ha ka sngi Balang.
Kane ka samla kaba dangdon ha ka jingshah pyntbit hapoh ka shlem ai jinghikai jong ka SAI Training Centre Shillong, ka la long tang marwei kaba la leit shim bynta ïa ka Jylla ha katei ka lympung kaba la sdang naduh ka 24 tarik, ha kaba ka la lah ban khur ïa katei ka takma ha ka High Jump jong kiba hapoh 20 snem rta da kaba la lah ban kynthih ha ka jingjngai kaba 1.60 mitar.
Kumba ka long mynta ka Anrisha ka dangdon ruh hapdeng ka jingpynkhreh na ka bynta ka 39th National Games ka ban long ha u 2027 ha kane ka jylla Meghalaya, ha kaba ka la ïoh jingshah hikai ruh ha ki coach ka tnat ïalehkai ka Sorkar Jylla kiba kynthup ïa ka Kong Daisy Marweiñ (Chief Coach) lem bad u Sumit (National Games Jumper Coach).
Halor kane ka jingwanrah nam bad burom ïa ka Jylla, na ka liang u Secretary ka Meghalaya Athletics Association (MAA) u Bah Finely Lad Pariat u la pynpaw ka jingsngewkmen halor ka jingjop katei ka samla. “Ka Anrisha Klein ka la wanrah burom ïa ka Jylla da kaba la wan ha ka kyrdan balai ne takma rnong ha ka High Jump U-20. Naduh ba ka la ïoh ka jingshah hikai kaba tang lai bnai kynthih, ka la ïoh ka lad ban shim bynta ha katei ka lympung ha Bhubaneswar.”
“Te kumta nga shim ïa kane ka lad ban ai khublei ïa ka, kumjuh ïa ki coach kata ka Kong Daisy lem bad kiwei kiba la don bynta lang halor ka jingpynkhreh na ka bynta ka National Games 2027,” u la bynrap da kaba ai khublei ruh ïa ka tnat ïalehkai halor ka jingbei tyngka ïa ka synjuk kaba la lah ban phah khynnah sha katei ka lympung.
Lah ban kdew ka Anrisha ka la khur ruh ïa ka takma rnong ha ka High Jump U-20 jong ka 36th East Zone Junior Athletics Championship 2025 kaba la long ha Ranchi da kaba ka la lah ban kynthih ha ki 1.51 mitar.
