Shillong, Lber 25
Ha ka jingkhynra kaba la pynlong da ka kynhun Anti-Narcotics Task Force (ANTF) bad Special Operation Team (SOT) ha ka sngi Balang ha ka thaiñ Iewduh, la ïoh ban kurup ïa u ganja ba don palat 85 kilo lem bad ka kyiad beaiñ.
Ïa kane ka jingkhynra la sdang naduh ka por 10:30 mynstep haduh ka por 5 baje janmiet. Ki pulit ANTF bad ki SOT kila pynlong ïa kane ka jingkhynra ha ki thaiñ Stand Jeep hadien ka jingïoh jingtip ïa ka jingdon ki briew kiba die beaiñ ïa ki jingdih pynbuaid.
U ganja bala ïoh kurup ha kane ka jingkhynra u la kot sha ka 85.945 kilo bad ka kyiad ka don haduh 1200 liter kynthup ka kyiad phareng kumba 10 case. Ïa ka kyiad la theh lut sha nala.
Shuwa ba ka kynhun kan poi ha kane ka jaka, kiba bun ki briew ba die ïa kine ki mar beaiñ kila ïoh phet krad bad ieh shadien ïa ki jingdih bad ka ANTF kala ïoh ban bat tang ïa uwei u briew bad ïa une u briew la aiti noh sha thanad Lumdiengjri ban register case katkum ki kyndon aiñ.
