Shillong, Lber 25
Ka National People’s Party (NPP) mynta ka la pynïar ïa la ki thapniang sa sha Jylla Assam bad ha ka sien kaba nyngkong eh kan ïakhun ïa ka ilekshon MLA ka ban long shen ha kane ka Jylla. Ka NPP ka la pynïeng ïa ki katto katne ki kyrtong ha ka ilekshon sha ka ïingdorbar thawaiñ jong ka Assam.
Halor kane, u National President ka NPP bad Myntri Rangbah ka Meghalaya u Conrad K Sangma u la pynpaw ïa ka jingsngew skhem ba ka NPP kan lah ban ïoh ïa ka jingjop ha Assam ha kane ka ilekshon ban wan, haba pynpaw ba ki jingpyrshang ka seng ka dei kaba la kut jingmut ba slem sha ka Jylla.
Haba kylli ïa ka jingthmu pynsuhthied ïa ka seng ha Assam, u Conrad u la ong, “Hooid, ka seng jong ngi ka angnud bha ban pynïar ïa ka jylli treikam ha kylleng ki jaka jong ka thaiñ Shatei Lam-Mihngi, ha Assam, ngim pat ju rung ha ki snem ba la leit. Ngi sngew ba ki don katto katne ki constituency kaba ngi la ïakren ïa katto katne ki nongïalam la slem bha bad kila pyni ïa ka jingkwah bad halor kane, ngi la shim ïa ka rai ban pynïeng ïa katto katne ki kyrtong”.
U la ban jur ba ki jingpyrshang ka seng ha Assam ki dei ki kam kiba la ïaid la slem bad kaba da kut jingmut.
“To ngin kyrmen ba ngin ym khmih ïa ka jingïaid lynti ka saiñpyrthei tang na ki ilekshon naba ha ngi, ka dei ka jingïaid lynti, ka dei ka jingaiti bad ngi la sdang ïa ka jingaiti jong ngi sha ka Jylla Assam bad ngin ïai bteng ban jam shakhmat bad ngi kyrmen ba ngin sa lah ban plie account ha kane ka ilekshon ha Assam,” ong u Conrad haba ïakren bad ki nongthoh khubor ha ka sngi Balang.
Halor ka lad ka lynti ban jop u Daniel Langthasa, u kyrtong ha kane ka ilekshon, u Conrad u la ong, “Khlem pep, un wanrah ïa ka jingkylla. U dei uba pawnam bha, u dei uba aiti shisha. U dei u briew uba don ka jingïohi jngai ïa la ki jong ki briew bad u briew uba sngewrit shisha bad ha kajuh ka por u dei u briew uba lah ban pynïadei ïa baroh”.
U la bynrap, “Ngi don ka jingkhmih lynti kaba jur bha na u ym tang na ka constituency jong u hynrei jong ka thaiñ baroh kawei ïa ka seng, u dei u dkhot ba kongsan bad nga thikna ba un ïoh ïa ka jingjop bad nga ai ka jingkitbok kitrwiang ïa u”.
