Shillong, Lber 25
Ka Shillong Lajong FC ka la long ba la pynkhreh ïa ka jingïakhun kaba ar shabar na la ïing ha ka National Football League pyrshah ïa ka Gokulam Kerala ha ka sngi Palei ha EMS Stadium kaba ha Kozhikode ha ka por 6:30 janmiet.
Ha ka jingïalehkai ba la lah kaba la long ha Aizawl, ka Lajong ka la lah ban pynliem ïa ka Chanmari FC da 2-1 kol bad kane ka la wan lyngba u Phrangki Buam, katba ka Gokulam ka la jop da 2-0 kol ïa ka Dempo SC.
Kumba ka long mynta ka Lajong ka la don ha ka kyrdan basaw ha kaba ka la kamai 7 poiñ bad ka dangduna sa lai poiñ ïa ka Sreenidi Deccan, kaba la lamkhmat ha kane ka lympung. Katba ka Gokulam ka la don ha ka kyrdan ba hynñiew bad kamai 5 poiñ.
Te kumta ha kane ka jingïakhun ka Lajong hapoh ka jingïalam u coach u Virendra Thapa ka la khmih lynti ban ïalehkai bha na ka bynta ban khur ïa ki lai point. Lada ka lah ban khur ïa ka jingjop kan ïaryngkat kyrdan bad ka Sreenidi Deccan. Lada ka Gokulam kan khun ïa ka jingjop kan ïaryngkat kyrdan bad ka Aizawl kaba don ha ka kyrdan balai.
