Shillong, Lber 25
Ki bahaïing lem ki samla wad kam pulit kiba la shah kyntait dang shen da ka Central Recruitment Board (CRB), ha ka 25 tarik u Lber, 2026, ki la leit mih sha ophis treikam ka Director General of Police (DGP) ka Jylla ban dawa ba dei ban ïoh ka lad ban phah beit bniah ha ki doktor lane ka ‘re-medification’ hadien ba ka Board ka la kyntait ïa kitei ki samla halor ka nongrim ba kim dei kiba shait ba khlain ne kiba don hapdeng ka jingbymbiang ka bor ïohi.
Uwei na ki bahaïing ki samla wad kam pulit u la ong ba ha ka 25 tarik u Rymphang, 2026, ka la mih ka result na ka bynta kiba aplai kam ha ka tnad pulit ka Jylla bad ha katei result don napdeng jong ki, kiba shah bat noh bad ka tei ka jingshah bat noh jong ki la ong ba dei na ka daw ban leh ïa ka jingpeit bniah biang da ki doktor, ki jingpynshisha na ki pulit bad ki kot ki sla.
U la ong ba la ai por hynñiew sngi ïa kine ki samla ban leit mih ha ophis ka CRB ban ïoh ka jingpynshai ba ki shah kyntait.
La ong ba ki la leit bad ha ka 24 tarik u Lber, 2026, la paw ha ki kaiphod khubor ba ka tnad pulit ka khot biang ïa ki ha ka 25 tarik u Lber, 2026 bad kumta ki la leit poi sha ophis CRB.
Hynrei ka jubab ba ki samla ki ïoh ka long beit-beit ba ki la shah kyntait na ka kam bad kim ïoh. Kumta na ka jingbym hun ki la wan poi sha ophis DGP bad ïakren bad u Dalton P Marak, IPS, Chairman ka Board bad kiwei-kiwei pat ki heh pulit ha kaba ki la batai ïa ki daw ba khlem phah leh ka jingpeit bniah biang ki doktor.
Shuh shuh une u bahaïing u la ong ba dei ban shah ban phah peit bniah biang ha ki doktor kumba shah ïa kiwei-kiwei pat.
