Shillong, Lber 25
Kum shibynta ban ïakhun pyrshah ne ban ratdyngkong ïa ki kam sniew ha ki shnong ki thaw jong ki thaiñ nong kyndong u Sub-Inspector jong ka Madanriting Police Station u Bah S Ryntong ha ka 25 tarik u Lber 2026 u la pynskhem ïa ki 40 ngut ki dkhot bad ki nongkitkam jong ka Village Defence Party (VDP) Mawlat kaba hap ha ka Mawkynrew Block.
Ha kane ka jingïalang pynskhem ïa ki dkhot jong ka VDP la ïadonlang u Coordinator Village Defence ka East Khasi Hill u Bah RD Rapthap, u Sordar Shnong u Bah Maron Suting lem bad ki dkhot shnong bad ki paidbah nongshong shnong.
Ki nongkitkam ba hakhmat jong ka VDP Mawlat ki kynthup ïa u Bah Bekham Suting kum u President, u Bah Wanribha Suting kum u Vice President, u Bah Donbor Khongjoh kum u Secretary, Rebika Khongjoh Assistant Secretary, Wandahun Khongjoh Treasurer bad ki Adviser Bah Maron Suting, Frankey Khongjoh, Abel Kshiar.
U Sordar Shnong u Bah Maron Suting haba kren u la pynpaw ba ka jingshim ïa kane ka sienjam ban pynbun ïa ki dkhot jong ka VDP ka long kum shi bynta ban ïakhun pyrshah bad ban ratdyngkhong ïa ki jingsniew hapoh ka shnong ka thaw bad ka ban long ruh ka jingshngaiñ ïa ka shnong ka thaw.
