Shillong, Lber 25
U MLA ka Sohra Constituency u Bah Gavin M Mylliem ha ka sngi Ba-ar u la plie paidbah ïa ka Umthli Sub-Centre kaba hap hapoh ka Laitkroh Khatarshnong C&RD Block.
Ki paidbah nongshong shnong ka Umthli ki pynpaw ba ki dap da ka jingsngew kmen bad phuh samrkhie namar ka jingïoh ïa ka jaka ai jingsumar kaba la paka bha hapoh jong ka shnong.
Ïa ka Umthli Sub-Centre lane ka Health and Wealthness Sub-Centre la wanrah lyngba ka skhim Pradhan Mantri-Ayushman Bharat Health Infrastructure Mission (PM-ABHIM) jong u snem 2022-23 ha ka jinglut kaba 55 lak tyngka.
Kane ka Sub-Centre kaba la long ka jingkyrkhu ba khraw ïa ka shnong kan ai jingshakri ïa ki palat lai hajar ngut ki nongshong shnong jong ka shnong Umthli.
Haba ai jingkren ha kane ka sngi u Bah Gavin u la ong ba la sdang ban pynsngew sha ki bor Sorkar naduh u snem 2011 haba ïadei ka jingdonkam ka Sub-Centre hapoh ka shnong Umthli bad u la pynpaw ka jingsngewkmen ba khraw ba kane ka jingangnud ka la urlong ha kane ka sngi.
U la ong ba ka jingwan ka jaka sumar ba paka hapoh jong ka shong kan long ka jingkieng ban pynïajan ïa ki nongshong shnong bad ki jaka ai jingsumar bad ki longkmie kiba armet kin pdiang ïa ki lad jingsumar ka ban pynsuk ruh shibun.
U la kyntu ïa ki paidbah nongshong shnong ba kin ai ka jingïatreilang bad ka tnad ka koit ka khiah ka Sorkar Jylla kumjuh ha ki prokram bapher-bapher jong ka Sorkar, khnang ba ki prokram bad ki jingthmu jong ka Sorkar kin long kiba jop.
Ha kane ka sngi plie ïa katei ka jaka ai jingsumar nalor u Bah Gavin M Mylliem MLA Sohra la ïa don ryngkat ka Deputy Commissioner ka East Khasi Hills ka Kong R. M Kurbah, u BDO ka Laitkroh Khatarshnong C&RD u Bah Wankhraw K. Kharbuli, MCS, ka District MCH Officer ka Dr. EL Kharmutee, ka District Medical & Health Officer ka Dr. AJ U Kharduid, Ka Medical & Health Officer ba peit ïa ka Laitlyngkot Primary Health Centre, ka Dr. L Jaba, u Rangbah Shnong Umthli u Bah J Mylliem, ki samla shnong bad ki nongshong ka shnong Umthli.
