Ha kine ki sngi, ngi la ïohi ba watla ki ïapher ha ki kam saiñpyrthei hynrei ki iehnoh shadien ïa kata ka jingïapher jingmut bad ban ïatreilang kum kawei ka kynhun na ka bynta ka bha ka miat bad ka bit ka biang jong u paid nongshong shnong. Kane ka dei ka jingjia hadien ka jingïatreilang hapdeng ka Trinamool Congress (TMC) bad ka National People’s Party (NPP) ha Garo Hills Autonomous District Council (GHADC). Kum kane ka nuksa ka long kaba donkam naba baroh ki ïeng ha ka nongrim ban ai ka jingshakri kaba paka bad ruh ban ïada ïa la ka jong ka jaidbynriew. Watla ki ïakynthoh bad ïather ha ka por ïalap ilekshon ne hapoh ka ïingdorbar thawaiñ hynrei haba donkam ban ïatreilang pat na ka bynta ka bit ka biang bad ïada ïa ka hok jong u paidbah, ki kloi ban ïatreilang da kaba iehnoh shadien ïa ka jingsngew seng.
Kum kane ka bynta ka long kaba donkam bha, ym dei tang ha GHADC, ngi donkam ba kum kine ki jingïatreilang na ka bynta ban ïada ïa ka hok u paidbah nongshong shnong ki dei ruh ban don ha KHADC bad JHADC bad kumjuh ruh ha ka Sorkar. Hooid, kum ki nongïalam ki lah ban kynthoh pyrshah ïa ka rukom treikam, ïa ki polisi ne halor ki mat ki jura hynrei haba kum ka jaidbynriew ka donkam pat ïa ka jingïada na ka jingthmu taplup jong kiwei pat, ka long pat kaba donkam ban ïatylli kawei bad bret lut ïa kita ki jingsngew seng sharud.
Ngi long kiba donbok ba hapoh ka Jylla jong ngi, kham ñiar ba ngin lap ba kan don ka jingkynthoh shimet bad pynkylla nongshun hapdeng ki nongïalam ym kum sha kiwei pat ki Jylla jong ka ri, ba jur ka jingïakynthoh shimet. Barabor ki nongïalam saiñpyrthei hangne ki kiar na ka kynthoh shimet bad halor ki kam kiba ïadei bad ka synshar ka khadar. Ki ïaleh ban kynthoh halor ki mat ki jura bad ïa ki kam kiba ïadei bad ki paidbah. Lehse harud-harud ki lah ban ïa kynthoh shimet, hynrei kam da kham paw than ha ki rynsan kiba lah ban ïa tip paidbah. Ngi kyntu ïa baroh kiba ïadon bynta ha ki kam saiñ hima sima ban ïa kiar katlah katïai na ka jingkynthoh shimet khamtam da ki kyntien tohmet ki bym wanrah jingmyntoi eiei, hynrei kiba lah ban pynkhluit pynban ïa ki paidbah bad pynlong nongshun hapdeng ki nongshong shnong tang namar ka jingbym lah ban long adkar ha ka ktien ka thylliej.
Ki Khasi ki ju ong ïa kane – Ka Ktien Kaba Tam – bad lada bakla ha ka ktien, ka lah ban mih sa ka thma ktien, bad kaba don ïa ka bor ban pynmih sa kiwei pat ki kam ïakynad ki bym sngewtynnad. Hooid, ki don ki ‘riew paidbah kiba sngewtynnad lada mih ka jingïakynthoh shimet hapdeng ki nongïalam saiñpyrthei tangba kum ki nongïalam kim dei ban ngop ha ka jingsngewtynnad ki paidbah. Tangba kiba bun na ki nongshong shnong kim sngewtynnad bad ki phai khmat sha ki nongïalam kiba lah ban pyni ïa ka saiñdur na ka bynta ka lawei jong ki bad ka Jylla. Kim da don por than ban ïa sngap ïa ki jingkynthoh shimet. Hynrei kin ïa pynshong nongrim ïa ki nia ki jutang kiba shisha bad kiba don jingmut.
Ka saiñpyrthei, lada ym nang ban kren ban khana, ka dei kaba pynbun nongshun bha. Teng-teng ha ka jingshongshit khlem nongrim, la kren ïa ki kyntien kiba lah ban pynsngew babe kylla. Ha ka pyrthei ‘Mobile Phone’ mynta, ka jynjar ban kyntait ïa kaei kaba la kren namar ki briew ki ïoh lad ban ring dur ïa ki jingkren. Shisien ba la bakla u thylliej, kan eh bha ban phai dien na kaei kaba la dep ban kren. Ha ki snem kiba mynshwa, kam da pher than bad dang don ka lad ban ïa buhrieh. Mynta, mar ïa ïoh ring dur uwei, sa tang katto katne minit, kato ka dur khih ka la saphriang kylleng bad yn ym lah shuh ban leh eiei. Namarkata, hap ban long adkar ha ki rynsan paidbah bad dei ban hikai ïa kiwei ruh ba kin long kumta.
