Shillong, Lber 25
Ka Sorkar Jylla kan sa shong bishar ïa ka jingdawa ban thung ïa ka jingtohkit halor ka jingkulmar kaba jia dang shen ha Ri-lum Garo, kaba mih na ka jingpyrshah ïa ki bar jylla ba kin ïashimbynta ha ka ilekshon Garo Hills Autonomous District Council (GHADC).
Ïa kane la pyntip da u Myntri Rangbah ka Jylla Conrad K Sangma haba kren sha ki lad pathai khubor ha ka sngi Balang.
Haba jubab ïa ka jingkylli, u Conrad u la ong, “U Nongïalam ka Liang Pyrshah u Mukul Sangma u la kren bad thoh sha nga ha kine ki khyndiat sngi. Ki jingjia kiba jia bad ka rukom long ka jinglong jingman kaba mih, ka donkam ïa ki kynja jingtohkit ba kan don ban tip ba kaei kaba lam sha kane ka jingkulmar bad mano ba donkti bad khamtam ka bynta ba shah pynjulor ki nongkynti paidbah, ki nongkynti ki riew shimet” .
U la bynrap “Hynrei kumno bad kaba kumno ka jingtohkit, ngin dang hap ban bishar namar hooid ngi la bunkam bad kane ka jinglong jingman. Kumta, ha kine ki sngi ban wan, ngin sa shim ïa ka rai (halor ka jingthung ïa ka jingtohkit)”.
Haba ïadei bad ka jingtohkit ïa ka jingkem naphang ïa ki briew hadien ka jingkulmar, u Conrad u la ong, “Sa shisien, nga la kren shai bha ïa kane ka bynta ba ka aiñ kan sa ïaid la ka jong ka lynti. Ki pulit ki ju shim ïa ki sienjam halor ki sakhi bad ïaid katkum ka aiñ. Ngam lah ban kynthoh eiei halor kane, ka dei beit ka kam ki pulit bad kam dei kaba nga ïashong bad nga bad pule ïa ki file bad ki jingtohkit”.
U la ban jur ruh ba u SP bad u DIG lane IG kiba dei peit kin long kiba biang eh ban ai ïa ka jubab, bad phi lah ban kylli na ki.
