Chennai, Lber:
Hadien ba ka la don ka jingïakren kaba la slem bha, ka Congress bad DMK ryngkat ki la pyndep ïa ka jingpynbeit ïa ka jingïasam shuki jong ka na ka bynta ka elekshon sha ka ïingdorbar thawaiñ ka jylla ban wan ha ka Union Territory, ha kaba ka Congress kan ïakhun 16 tylli ki seat bad ka DMK kan ïoh 14 tylli.
Ka DMK kan ïasam ïa ka bynta jong ki 14 tylli ki shuki jong ka bad ki seng ba ïatreilang jong ka, kynthup ïa ka VCK bad ki seng ka kynhun Left kiba dei ki bynta jong ka kynhun INDIA ha Puducherry.
Ïa kane ka jingpynbna la pynbna da u MP ka DMK uba dei ruh u nongpeit ïa ka seng na Puducherry u S Jagathrakshakan uba la ai jingkren sha ki nongthoh khubor ryngkat u president ka Puducherry Pradesh Congress Committee bad u MP u V Vaithilingam ha kawei ka hotel ha Pondy ha ka janmiet jong ka lah sngi U Blei.
Wat la ka la pynkut noh ïa ka jingphiah seat hapdeng ka Congress bad ka DMK, hynrei ka seng kam pat pynbna ïa ka jingsam ïa ki konstitwensi hapdeng ki paralok wat hadien ba ka tarik ba khatduh ban thep kyrteng ka la kut ha ka lah sngi U Blei.
Ym pat don ruh ka jingshai halor ka rukom ban long nongïalam jong ka kynhun synrop, kynthup na ka bynta ka shuki Myntri Rangbah ne mano ban ïalam pura ïa ka kynhun ha ka elekshon.
Ha ki katto katne ki khep, ki kyrtong na ki seng ba ïatreilang ki la thep kyrteng ha kijuh ki konstitwensi namar ka jingbym don ka jingïateh kular kaba pura.
U Jagathrakshakan u la pyni ba ïa kine ki jingïatyngkhuh yn sa pynbeit noh shen. “Ngin sa ïakren bad pynkut noh.Hadien kata, kiwei pat kin sa weng noh ïa ki kyrteng”, u la ong.
Ka rai halor ka jingsam ïa ki konstitwensi ka lah ban pynjlan wat haduh ka 26 tarik u Lber, ka tarik ba khatduh ban weng ïa ki kyrteng, lada ïaid katkum ka por ba la shim ban pyndep ïa ka jingïateh ban ïasam ïa ki shuki, ong ki riewshem-phang ha ki kam saiñ pyrthei.
“Ha Puducherry, ngi ïakhun ïa ka elekshon kum ka kynhun synrop, kaba kynthup ïa ka Congress, DMK, CPI, CPM, IUML, bad DMDK. ‘Prosperous Puducherry, Strong Puducherry’ ka dei ka kyntien pyrta jong ngi”, la ong u Jagathrakshakan.
Ka mat ban ïoh jylla kyrpang ïa ka Puducherry kan dei ka jingdawa ïalap elekshon kaba nyngkong eh, u la ong bad bynrap ba u Myntri Rangbahduh ka ri u Narendra Modi uba la wan sha Puducherry na ka bynta ka jingïalap elekshon um shym la kren eiei halor kane ka mat.
La khmih lynti ba ki heh nongïalam, ba kynthup ïa u Rahul Gandhi, u nongïalam jong ka seng Congress bad u Udhayanidhi Stalin, Symbud Myntri Rangbah jong ka Tamil Nadu, kin ïalap elekshon ha Puducherry, ha kine ki sngi ban wan, ong u Jagathrakshakan.
