Shillong, Lber 26
Ka Khasi Students’ Union (KSU) kala aiti ïa ka thup jingdawa ba san tylli ki mat ha u Chief Secretary ka Jylla Dr Shakil P Ahammed, haba maham ban leh da kaba tyngeh lada ka Sorkar kam lah ban leh eiei halor kine ki mat.
Ka jingdawa ka kynthup ïa ka jingpyntreikam ïa ka amendment jong ka Meghalaya Identification, Registration (Safety & Security) of Migrant Workers Act, 2020, ka jingpynkylla ïa ka rukom treikam ha ka District Selection Committee, ka jingweng noh ïa ki jingbthah ïa ki khynnah skul ban rwai “Vande Mataram”, bad kyndang ïa ki nongbuhai shnong beaiñ na Mahadev Khola bad Maxwelton Estate.
“Ngi pynrem jur ïa ka jingbym lah ka Sorkar ban pyntreikam ïa ka Act wat hadien arsnem ba mynjur ïa ka Bill. Lada dang don kano-kano ka jingpynslem, ngi hap ban pynlong biang ïa ka jingkyndang ïa ki nongbylla bar jylla,” ong u General Secretary ka KSU samla Donald V Thabah bad Asst General Secretary Reuben Najiar ha ka dorkhas.
Haba ïadei bad ka District Selection Committee, ka KSU kala pynpaw ba ka risol ba dang shu pynmih ka dei kaba “don jingbakla bad ka leh bakla palat, kaba dap da ka jingjied briew lajong bad ka bamsap”.
“Lada ym wanrah ïa ka jingpynkylla, ngin shim ïa ki jingïakhih kiba ïapher ha ka Nongbah bad ki Headquarter jong baroh ki District,” kila maham.
Ka KSU kala pyrshah ruh ïa ka jingbthah ban rwai “Vande Mataram” ha skul, haba kdew ba ka dei ka jingrwai ba kren shaphang ki Blei Hindu, ka bym ïahap satia ban pynbor ha ka ban pynrwai ïa baroh ki jait niam ha kane ka Ri kaba burom ïa baroh ki jait niam. “Lada ka Sorkar ka dang bteng ban pynmih ïa kum kine ki jingbthah, ngim banse ban shim ïa ki sienjam kiba tyngeh,” kila pynpaw.
Ka Seng kala kyntu ruh ïa ka Sorkar ban pynsted noh ïa ka kam ba ïadei bad ka jingkyndang ïa ki nongbuhai shnong beaiñ na Mahadev Khola bad Maxwelton Estate, bad ban leh eiei halor ka jingthungkam ba dang sahteng ha NEIGRIHMS.
“Ngi kyrmen ba ka Sorkar kan shimkhia ïa ki jingdawa jong ngi bad ban leh eiei mardor ban pynbeit ïa kine ki kam ba la sahteng la slem,” ong ki nongïalam ka KSU.
