Shillong, Lber 26
U Chairman jong ka Confederation of Meghalaya Social Organizations (CoMSO) bad uba long ruh u President ka Hynñiewtrep Youths Council (HYC) u Bah Roykupar Synrem u la shah khot hajir ha Sadar Police Station ha ka sngi Palei, namar ka jingdon kiba ujor ejahar pyrshah ïa u bad ba la kynnoh ba u wanrah ïa ka jingpynïapher niam.
Kane ka jingkhot hajir ki pulit ka Sadar Police Station ka dei hadien ba ki pulit ka Lumdiengjri Police Station ki la ujor ejahar ha ka 14 tarik Lber pyrshah ïa u, ba la kynnoh ba ka jingkren jong u ha ka jingïalang ba la long myn ha ka 11 tarik Lber ha Motphran kaba la saphriang ha ki rynsan ïatai paidbah (Social Media) ka lah ban wanrah ïa ka jingsngew ïapher niam ha ka Jylla bad ka Ri India.
Haba kren sha ki nongthoh khubor u Bah Roykupar u la kubur ba u la kren ïa ki kyntien “Lada ki para riewlum ki jong ngi, ki Garo ki donkam ïa ngi kum ki Hynñiewtrep ban ïadon lang ryngkat bad ki, ngi ruh ngin ïa don ha syndah jong ki, ban rah ïa ki tiar ki tar” bad ong ba la don kiba pynsaphriang tang ïa katei ka bynta jong ka lyngkhot video, hynrei u la kyntu ba kin sngap ïa baroh ka jingkren jong u, khnang ban sngewthuh ïa ka jingmut.
U la ong ïa kane la shim Suo-moto hi da ki pulit ka Lumdiengjri Police Station da kaba ki la ong ba kane ka jingkren jong u lehse kan wanrah ïa ka jingïapher niam bad kan pynthut ïa ka shongsuk shongsaiñ ha ka Jylla bad ha ka Ri baroh kawei.
Ha kaba ïadei ka jingkren jong u halor ka jingrah ïa ki tiar ki tar lada ki Garo ki donkam, la pynngat kyndon ïa u hapoh ka Section 196 (1).
