Shillong, Lber 26
U Lat ka Jylla Meghalaya u CH Vijayashankar ha ka sngi Balang u la pynlong ïa ka jingïalang bad ki ophisar ki jaka pule kiba don ha kylleng ka nongbah Shillong ban ïakren halor ki lad ki lynti ban khyllie biang ïa ka kyrdan jong ka pule puthi hapoh ka Jylla.
Ha katei ka jingïalang la shim bynta lang da ki heh ophisar jong ki jaka pule ba pawkhmat ka Jylla kum ka North Eastern Hill University, ka Captain Williamson Sangma State University bad ka National Institute of Technology kumjuh kiwei de, ki la pynbeit jingmut ban pyntreikam ïa ka jingai jingmut jong ka jingïalang ki Lat ba la pynlong ha u bnai Nailar jong ka snem 2024.
“Ngi donkam ban kyntiew ïa ka jingtbit ha ka pule puthi lyngba ki jinghikai kiba biang, ki jingpynthymmai ia ka rukom hikai, bad jingwad bniah kiba khlaiñ” la ong u Vijayashankar.
Shuh-shuh u la ong ba ki jaka pule ki dei ban pynleit jingmut ha ka jingpule kaba pynshong nongrim ha ka jingmih na ka bynta ki samla pule bad ban thaw ïa ka rukom ai jinghikai kaba pura kiba kyntiew ïa ka bha ka miat, ka jingïadei bad ka jingkynthuplang ïa ka jingnang jingstad ba kham halor.
Ha katei ka jingïalang la pyrkhat kiba bun ki mat ba kongsan kiba kynthup ïa ka jingpynbha ïa ka rukom ai jingithuh bad jingbishar bniah ïa ki jaka pule, ka jingpynbeit haba ïadei ka jingduna ki nonghikai bad ruh ban pyntreikam ïa ka National Education Policy.
U Lat u la ban jur ïa ka jingdonkam ban long kaba shai bad kaba biang por ha kaba thungkam hapoh ki skulbah bad kyntu ïa ki jaka pule ban buh hakhmat eh ïa ka jingbha jingmiat jong ki samla pule bad ka jingpynroi ka jaka pule, u la pynpaw ïa ka jingsngewkhia halor ka jingpyndonkam bakla ïa ki jingdih buaid hapdeng ki samla bad u la kyntu ban shimkhia ban leh da kaba tyngeh khnang ba ki khynnah pule kin lait na u drok bad kiwei ki jingdih pynbuaid.
“Ngi dei ban shim ki lad ba khlaiñ ban shna ïa ki lad jingtip, ban ai ïa ki jingai jingmut bad ban pyntreikam ïa ki rukom peitngor kiba pyrkhing,” la ong u Lat.
U Lat u la ong ba ki jaka pule ki don ïa ka bynta ba kongsan ban tei ïa ka ri bad ka dei ban ïakhun pyrshah ban pynmih ym tang ïa ka pule puthi kaba biang, hynrei ïa ka imlang sahlang bad ki nongshong shnong kiba don ka jingkitkhlieh.
