Shillong, Lber 26
Ka lympung ïalehkai P.A.Sangma Memorial T20 Cricket Tournament 2026 ba la pynïaid da ka Shillong Cricket Association (SCA) ka la nangjam shaphrang ha kaba ka Sputnik CC bad ka Langsning XI CC ki la khur jingjop ha ka sngi Palei.
Ha kane ka jingïakhun kaba la long ha madan jong ka MCA ha Polo, ka Sputnik ka la pynliem noh ïa ka Mawsyiem CC da 94 run. Ka Suptnik kaba la kam trai ban tied nyngkong, ka la kamai 208 run bad shah pynhap 4 wiket ha ki 20 over. U Kshittij Singhania u la long u nongtied uba kynsai ha kaba u la ïoh ban khyrwit ïa ka shiteng spah kaba 82 run na ki 46 bol bad u Amiangshu uba la tied 57 run na ki 37 bol. Katba u Devention Lyngdoh u la khur 1 wiket na ka bynta ka Mawsyiem.
Haba wan beh ïa ka thong, ka Mawsyiem ka kamai tang 114 run bad shah pynhap 9 wiket ha ki 20 over. Kane ka la wan lyngba ka jingïalehkai bha u Aditya Singhania bad u Amiangshu, kiba la khur mar 3 wiket na ka bynta ka Sputnik. Katba u Khraw Mylliem u la tied 47 run na ki 47 bol. Ïa ka nam Player of the Match la khur da u Amiangshu, uba la tied 57 run bad khur 3 wiket.
Haba phai sha kawei pat ka jingïakhun kaba ar, ka Langsning XI CC ka la jop da 161 run ïa ka Metallic Rising CC. Ka Langsning kaba la shimti ban tied nyngkong ka la kamai 212 run bad shah pynhap 4 wiket ha ki 20 over. U Ibit Thabah u la long u nongtied uba kynsai ha kaba u la ïoh ban khyrwit ïa ka shiteng spah kaba 61 run na ki 38 bol bad u Nishanta Chakraborty uba la tied 58 run na ki 33 bol. Katba u Abid Khan u la khur 2 wiket bad ïa ka 1 wiket la khur da u Jaspal Singh.
Haba wan beh ïa ka thong, ka Metallic Rising ka la kamai tang 51 run hadien ba ka la shah pynkhyllem baroh ki nongtied ha ki 11. 4 over. Kane ka la wan lyngba ka jingïalehkai bha u Ronnie Nongrum bad u Zahir Alam, kiba la khur mar 3 wiket. Katba u Rahul Singh u la tied 14 run na ki 14 bol. Ïa ka nam Player of the Match la khur da u Ibit Thabah, uba la tied 61 run.
