Shillong, Lber 26
Kum shi bynta ban pynpaw sha ka Sorkar haba ïadei ka jingdawa jong ka Hynñiewtrep Youths Council (HYC) ban shna noh mardor ïa ka “Khyndailad Shlem Deiriti”, ha ka sngi Balang ka la sam da ki kot lyngkdop sha ki paidbah ba leit ba wan bad ki kali ha ki bynta jong ka Khyndailad.
Kane ka jingdawa ka HYC ban tei noh ïa ka “Khyndailad Shlem Deiriti” ka long ban ai rynsan ïa ki kaitor ki duhalia ba na kylleng ka Jylla kiba don ïa ka sap ban rwai ki sur rwai sur tem bad ki rukom shad tynrai.
Nalor kata ka HYC ka dawa ruh ban tei ïa ki basa ba ïaineh na ka bynta ki jingbam jingdih tynrai bad ka thaiñ ka wet ki mar shna kti tynrai, ka ohdur ohdar ki jingtei ïing tynrai ba phalang ka kyrteng jong ka Khyndailad.
U Bah Purning Shabong Secretary ka Socio Cultural Cell ka HYC u la ong ba kane ka jingdawa jong ka seng ka long ban ailad ïa ki riewlum ba kin lah ban sei la ki sap rwai, sap tem, sap shad tynrai bad ki sap thaiñ mar shna kti tynrai sha ka pyrthei baroh kawei.
Shuh-shuh u la kdew ba ka Khyndailad ka dei ka jaka ba pawnam tam jong ka Nongbah Shillong bad kaba long ruh kum ka dohnud jong ka Sor.
U la ong ruh ba ka seng ka la dep ban phah jingthoh sha u Myntri Rangbah ka Jylla u Conrad K Sangma haba ïadei kane ka bynta ban kyntu ïa ka Sorkar ba kan thaw ïa kum kine ki jaka ba kan long ka jingkhring ïa ki nongwan jngohkai pyrthei ba na kylleng bad ka ban long ka kabu ban ai kam ai jam ruh ïa ki khun samla jong ka Jylla.
